SAM 57 - Cho Bible Common Language 2016

A na M’htei vai ah Taigü

¹ Kei cu na m’gein ä, Khanpughi, na m’gein ä, phyawn nak gah vai ah ka lawk ci nei. Pui khokhi kä a ng’düm pha ah chuih na ng’phya hnim ka ah ka ng’yii ci nei.

² Ak hlüngtai pi bäih, Khanpughi ah ka ng’khü ci, ka ng’yak hlü päng, na k’be ciah Khanpughi ah.

³ Ani naw khan kho ah ka naw na m’shang ne, na hun khai; kei na m’di hlük ci gui cu hnim gui khai. Khanpughi naw ng’täi ciah am hni nak la a bekhüt nak cu na m’hnun khai.

⁴ Kei cu chang ei ciah kawng gui ah mäih ah kyak ciah gaa gui naw nak khai ci gui. Ami ha gui cu k’htei la m’la ah mäih ah kyak ci, ami m’lei gui cu chim ah mäih ah ghaat ci.

⁵ O Khanpughi, na dämduh nak cu khomik ung m’dang ä, na bäimang nak cu m’dek khan avan ung be sä.

⁶ Ka gaa gui naw ami na pha nak vai ng’vai cung ci gui; kei naw thüi lü nak awn ka phlän ci. Ngami naw ka lam ung m’vam co ci gui, cun ung phi ami mät kya ba ci gui.

⁷ O Khanpughi, kei cu akbe ah ka citheing ci nei, kei naw ng’äi m’cu ne ka ning m’taam khai!

⁸ Ka mümcha, Tho law! Ka tingtäng la ka phyung heng tho law vä! Kei naw nu k’hni ka m’tho khai nei.

⁹ Chang pakhui ah ng’lung ah ka ning m’hlüngtai khai nei, O Bawipa, chang gui ah ng’lung ah ka ning m’taam khai.

¹⁰ Na yum hni nak cu khankho ah gawk ci; Na bekhüt nak naw khomik han tawn ci nei.

¹¹ O Khanpughi, na dämduh nak khomik ung m’dang ä, Na bäimang nak m’dek khan ung be sä.