SAM 56 - Cho Bible Common Language 2016

Khanpughi ung Ng’ap ne Taigü

¹ O Khanpughi, kei cu na m’gein ä, kei cu na tuk ci gui nei, ka gaa gui naw angtäi sei na dukdeiu nak ci gui nei.

² A hnüüp pum ung na thüi na ne na ng’tuk püi ci gui nei. Kei na hnim cicu da aih ci nei.

³ O hlüngtai ci Bawipa, kei ka kyih yah ung nang ka ning ngaih u ci nei.

⁴ Kei cu Khanpughi ngaih u ne, kä ka kyik ci; A shaitak ah hmawk ah ka m’taam ci. Hniciim chang naw kei cu a i ah na ci hlawt khai aw?

⁵ Ka gaa gui naw ak hnüüp pum na khüikha sak ci gui, angtäi sei na ceng cham ci gui!

⁶ Ngami cu ang thuh nak ah ng’bum u ne, kei ah ka bi phung däät ci gui, na ngawn khai gui ah ng’bü ci gui.

⁷ O Khanpughi, ami kat ah hmawk ah m’kyuk gui ä; Na m’lung she nak awn hnim gui ä!

⁸ A i hlawk ah ka khüikha cu nang naw na hmat ci; ka ng’phli tui cu gi na ne, na gim ci. Ngami naw na na uk ung kä m’hnüt tu u ne ang?

⁹ Kei naw ka ning khü hnüüp ung, ka gaa gui cu ng’hlat ba khai gui. Cun cu ka hmat ci; Khanpughi cu kei lam ah om ci —

¹⁰ Bawipa, na shaitak cu ka m’taam ci.

¹¹ Ani ka ngaih u ci, kei cu kä ka kyik khai. Hniciim chang naw kei cu, a i ah na ci hlawt khai aw?

¹² O Khanpughi, kei naw ka shaitak cu ka ning ap khai nei; ka m’hlümtäi nak cu ka ning pek khai nei,

¹³ a i ah kyasei ci ung, nang naw sih nak ung na gung ne, di nak ung na na khui ba ci. Cun ah kyasei, kei cu Khanpughi ah ma, ghin ci gui ah khan ah ng’shü ciah akdei ung ka hteit ci.