SAM 55 - Cho Bible Common Language 2016

A Teihpüi naw Gaa am a Ap ah Chang ah Taigü

¹ O Khanpughi, ka taigü na ng’yak pe ä; ka ng’hawh sangung kä na ng’hlah ta ä!

² Na ngaih pe neta, na m’shang ä; cäi ng’ä ne ka ng’hlo ng’ei ci nei.

³ Ka gaa gui ah k’aw ng’ya ne, ka kyik ci nei, Changshe gui naw na hnim u sei, ka yai ci nei. Ngami naw na geinvai sak ci gui, Na m’lung she na u ne, na gen ci gui.

⁴ Kei cu ka cäi ng’ä ci, sih nak ah kyih nak naw na dep ci nei.

⁵ Kei cu kyi aih ne, nak phawng sei ka ng’thüng ci; kyih nak ung ka gein vai ci.

⁶ Müm ah mäih ah ka ng’phia a om vai ka m’hni ci, A hei ah zong ne ka ng’düm hlük ci.

⁷ Kei cu a hei ah zong neta, bungpuk im nah ne ka om hlük ci nei.

⁸ Pui khokhi ne, tuinu ang hnawk ung ng’yii nak vai ang ghit ah ka shui ci nei.

⁹ O Bawipa, ka gaa gui ah thu cu ng’gogan sak gui ä! Zawshe nak la guh tep nak cu mang gaw ung ka hmu pyi ci nei.

¹⁰ Amü ak hnüüp mang gaw veing ne, ng’hleh shüi ci gui, shetkat nak la khüi nak cu be ci nei.

¹¹ Plawh sheh nak cu avan ung om ci; shedam nak la hleeihlak nak cu lam gui ung be ci.

¹² Kei na gaih m’giu cicu ka gaa ah a kyak vai sü ung, ka hnim gei khai sü te, kei na k’shekha nak cicu na gen ciah a kyak vai sü ung ka ng’shawn pek khai sü te.

¹³ Cun ung phi, cun ah chang cu nang, ka paw, ka chang, ka teihpüi ah kyak ci.

¹⁴ Mikmi cu kä m’zih thuh ne ng’thu htau ne, pum im ung atäng ah hteit ne mi khawihnah ciah kyak ci.

¹⁵ Ka gaa gui cu si hlah u sä; m’htei kho ah ak ghing ah hteit u sä! Akshe cu ngami ah m’lung ung la ngami ah im ung om ci nei.

¹⁶ Cun ung phi Bawipa, Khanpughi cu na m’htei khai ah ka khü khai, ani naw na hun khai.

¹⁷ Kho ngawi kho hnüüp, khomü ung kei cu ng’thu m’da ne ng’pa ngä sei, kei ah ka k’aw cu na ng’yak pek khai nei.

¹⁸ Gaa gui akda tu ne, ng’tuk ka bi nak ungka, nak phyawn ne, na law püi ba khai nei.

¹⁹ Ang täi ah uk ciah Khanpughi naw na ng’ya ne, ngami cu hnim gui khai nei; Ngami cu ami m’lung kä m’thawng u ne, Khanpughi kä kyih aa ci gui.

²⁰ Ka teihpüi k’phyim naw a püi gui ng’tuk püi gui ne, a shaitak phi m’shet ci.

²¹ Ani ah ang thu cu suuktui ah hnip pi ci, cun ung phi am lung kyong ah thüi nak om ci; Ani ah angthu cu situi mäih ah a dän ung phi, chim ah mäih ah ghat ci.

²² Na khüikha nak cu Bawipa ah ma ah chah ä, ani naw ning shung khai nei; düng ciah chang cu chang hei gui am kä hnim sak gui phung ci nei.

²³ O Khanpughi, cun ung phi nang naw, Chang ngawn ci gui la m’gu hleei ci gui cu, ng’cim hmun ung na hteh sak gui khai, ngami cu kä chang cawih khai gui. Cun ung phi kei läi cu nang ka ning ngaih u khai nei.