SAM 52 - Cho Bible Common Language 2016

Khanpughi ah Ng’thumcha nak la Abä nak

¹ M’gäi ciah chang shetkat nak awn a i ah kyasei na khähghah ang? Khanpughi ah bekhüt nak cu ng’lang täi ci nei.

² Nang cu chang m’di vai na pawng aih ci; Nang ah m’lei cu sem ghaat awn täng ci. Nang cu angtäi sei hleei nak na tüisho ci.

³ Nang cu akni ah ta, akshe na m’hni pi ci, düng nak ah ta, hleei nak na m’hni pi ci.

⁴ Thuvi ciah chang, nang cu na ng’thu awn chang m’di vai ah m’hni ci.

⁵ Cun ah kyasei nang cu Khanpughi naw ning m’shet lä khai; Nang cu ning pang ne na im ung ka ning täm ne, A hnun ghing ah om nak ah kho ung ka ning k’plon khai.

⁶ Düng ciah chang gui naw cun cu m’hmuh u ne ta, kyik khai gui; Ngami naw nang cu ning gaih tu u ne ta,

⁷ “Teng vä, Shin ah chang cu phyawn vai ah Khanpughi ng’kä yii hnei ci nei, amät ah khawh düt ngaih u ne, akshe lam awn a phyawn nak vai shui ci nei.”

⁸ Cun ung phi kei cu Khanpughi ah im ung ghing ciah Olive sing ah mäih ah ka kyak ci nei. Kei naw hlim ciah am hni nak cu angtäi sei ka ngaih u ci nei.

⁹ Khanpughi, na bi lawh gui ah hmawk ah kei naw angtäi sei ka ning yei nak khai nei; Nang ah na ni nak ah mawng cu na chang gui ah ma ah ka ng’shäu khai nei.