SAM 51 - Cho Bible Common Language 2016

A na M’geinsei vai ah Taigü

¹ O Khanpughi, na m’hni nak awn na chimgein ä. Hlüngtai ciah na m’gein nak awn ka katnak gui na phai pe ä.

² Ka shet nak gui phung na m’si pe ne, ka cheishoh nak phung na theing sak ä!

³ Ka shetkat nak gui cu ng’coi ng’pa ne, ka cheishoh nak gui cu ka ngaih-tüh yai ci nei,

⁴ Kei cu cheishoh ne ka ning hnu nak ci, ka ning hnu nak ci nei — Nang naw akshe ah na k’bäi cu kei naw ka bik ci nei. Cun ah kyasei nang naw düng ci nei ciah na ng’thumcha ne, nang cu kei na na m’kyuk khai ah na taga ci nei.

⁵ Kei cu ka ng’tüi law ge ung ka shetkat ci, ami na käu nak ge ung ka cheishoh pyi ci nei.

⁶ Bä nak la ng’düng nak cu na m’hni ci kya ne, Na cüivai nak awn ka m’lung na k’be ä.

⁷ Ka katnak na k’seh pe ä, kei cu ka theing khai; Na m’si ä, khüi ah ta ka bawk pi khai.

⁸ Yeikyai nak la lünlawi nak ah k’aw cu na ng’yak sak ä; cun ung hnget ne khui khai ah na bi ah ka m’lung cu, yeikyai ba khai nei.

⁹ Ka cheishoh nak gui cu kä na teng pe ne, ka shet nak gui cu na lim pe ä.

¹⁰ O Khanpughi, ka m’lung ang ciim na tüisho pe ne, mümcha k’thai, bekhüt nak na yuk thunthan pe ä.

¹¹ Na ma ungka kä na k’tääm men ä; Na Mumcha Theing kä na lak en pe ba ä.

¹² Na hun nak ungka lawk ciah yeikyai nak cu na be tu ba ä, ka ning läk nak vai ah na ng’yak hlü ah na pyang ä.

¹³ Chang kaa gui am na thukhän cu ka m’thei gui khai nei, Ngami cu nang ah ng’hlat law ba khai gui nei.

¹⁴ O Khanpughi, ka ghin nak cu na pyang pe ne, na hun ä, kei naw yeikyai ne nang düng nak ka shüm khai nei.

¹⁵ Bawipa, ka ng’thu thei vai ah na m’thei ä, ka ning m’taam khai nei.

¹⁶ Ghu tha cu nang naw kä na ng’ya hlük ci, kä cun ung kei naw ka ning pek khai sü te; mei awn m’khih ne khawihnah phi kä na m’hni ci.

¹⁷ O Khanpughi, kei ah khawihnah nak cu, ng’gäi ciah m’lung nei. Nang naw ng’gäi ciah m’lung la ng’yu ba ciah m’lung cu kä na nawng düt ci nei.

¹⁸ O Khanpughi, Zion mang gaw cu m’gein ne m’hteihtang ä; Jerusalem mang gaw pang cu tah ne thong ba ä.

¹⁹ Cun ung ghutha nak, mei awn m’khih ne khawihnah nak gui cu nang naw yei ne dou ci sei; seipat gui awn phi na mang kyang ung khawihnah vai nei.