SAM 50 - Cho Bible Common Language 2016

Khawihnah nak Akcang

¹ Ak hlüngtai pi Khanpughi, Bawipa naw thu pyen ci; Ani naw khomdek khan akhei ak kyang avan khü ci.

² Khanpughi cu Zion ah khan ah yuk shü ci, cun ah mang gaw cu kyom ne kümbe ci.

³ Mi Khanpughi kyum lawk ci, kä chawkchek ne kä om ci, a ma ung mei m’lei tawt ne, pui kho khi nu naw kiung ci.

⁴ A chang gui am khoi m’cha cu hmu tuk khai ah Ani naw khankho la khomdek cu khü ci.

⁵ Ani naw, “Bekhüt ciah ka chang gui, pek tak m’ghu tha ne thukän ci gui, kei ah law ne ng’bum law bä” cik ci.

⁶ Khan kho naw ng’shäu ne, Khanpughi cu düng ci, ani cu suki ah kyak ci, cik ci.

⁷ “Na ngai vä, ka chang gui, thu ka pyen lawk khai; Israel chang gui, kei naw hnu ng’tuk ne ka ning m’nüm khai. Kei cu Khanpughi, nami Khanpughi nei.

⁸ Na ghutha nak, angtäi sei mei awn m’khih ne, na law püi ah hmawk ah kä ka ning gen ci.

⁹ Cun ung phi na ng’vong kyong ah sei gui, na cham kyong ah me gui kä ka ng’ya hlük ci;

¹⁰ Bung ah om ciah khisa phiu kaa gui, a van la khomhtung akda ung lum ciah sei ma gui cu kei ah ka nei.

¹¹ Kha gui ami van la ak ghing om avan kho ng’lei ung om cicu kei ah ka ah kyak ci.

¹² “Kei cu ei ka cawi ung phi kä ka ning yoi khai, m’dek khan ung om ci avan cu kei ah ka ah kyak ci.

¹³ Kei naw sei sa ka ei khai ma, me si ka awk khai ma?

¹⁴ Yeikyai ne ghu tha nak cu Khanpughi am pe vä, Nami shaitak om ciah mäih ah hlüngtai pi cu khawihnah vä.

¹⁵ Khüikha nak a gawk law ung na khü vä; kei naw ka ning hun gui khai, nangmi naw nami na m’taam khai.”

¹⁶ Khanpughi naw changshe gui-am “A i ah kyasei ka thumkhän na täitawk vai ang? A i ah kyasei ka shaitak na pyen m’shet vai ang?

¹⁷ Ka ning m’cäi phi kä na ng’yak ci, ka thu phi na hnu nak ci.

¹⁸ Nang cu na hmuh phung m’guk ei gui ah teih püi ah kya ne chang plet ah paw chang ah na kyak ci.

¹⁹ “Nang cu angtäi sei thu k’she ah thu ne, akshe na pyen vai kä na geing na phung ci.

²⁰ Nang cu na mät ah phäi nau ng’küknet püi ne, na ng’vok ng’shan püi ci.

²¹ Nang naw shin ah mäih gui bik ci sei, kei naw a i kä ka pyen ci. Cun ah kyasei kei cu nang ah mäih ah ka kyak ciah na ngai ci. Cun ung phi tuhbäi nang cu ka ning züi m’cäi ci.

²² “Shin cu ngai vä, nangmi kei kä na shüm ci gui, kä cun ung — kei naw ka ning m’di gui khai, Ning hun gui ci a u kä om ba khai.

²³ M’hlüngtai nak khawihnah ne bik ciah chang cu, kei na m’taam khah ciah kyak ci, kei na läk ciah chang phung cu akcang ah ka hun khai nei.