SAM 5 - Cho Bible Common Language 2016

Ana Shungvong Vai ah Taigü

¹ Ka ng’thu cu na ngaih pe ä, O Bawipa, Ka ng’hui cu na ng’yak pe ä.

² Na na m’htei vai ah ka kyah cu na ngaih pe ä, Ka Khanpughi la ghangpughang! Nang ah ka taigü ci, O Bawipa;

³ Kho ngawi hta ung ka k’aw cu na na ng’yak pek ci; Kho hni pyü ung taigü ne ng’ap ne, Na na m’shan cu ka ging ci nei.

⁴ Nang cu cheishoh nak yei nak ciah Khanpughi ah kä na kyak ci; Ak she phung na ma ah kä na hmu hlük ci.

⁵ Nang cu chang k’awm ci gui täng ah kä na ng’düi ci; Nang naw changshe gui avan cu na thüi nak ci.

⁶ Hleei cicu na m’di ci, Chang ngawn ci la thuvi cicu na päipih ci.

⁷ Cun ung phi küikyang ciah na m’hni nak awn, nang ah im khui ah ka law hning ci nei; Na Taigüim theing ung khawihnah hning ne, Na ma ah kawp ne ka ning m’tam khah hning ci nei.

⁸ Bawipa, kei cu ka ga da aih aih ci nei! Na ng’yak hlü ka bi vai ah lam na m’shüm ä; Ka ning läk vai ah na lam na pyan pe ä.

⁹ Kei ah ka ga gui ah thu ung bekhüt nak kä om phung ci; Ngami naw ah m’di hlü bäng ci gui. Ngami ah ng’thu cu ng’awi gi müi ne, hnip ci, Cun ung phi chang m’di nak ah hleei awn be ci.

¹⁰ O Khanpughi, m’kyuk ne m’kat gui ä; Ami mät ah ng’zihkuh nak naw ami mät chah gui ci nei. Ami katnak gui la ami ning hnu ng’tuk püi ah hmawk ah, Na ma ungka naw k’täm gui ä.

¹¹ Cun ung phi nang ung phyawn nak gah ciah chang van cu, yei u sä; angtäi ah yei ne ng’äi m’cu u sä. Ning m’hni ci gui cu shung vong gui ä; Nang ah hmawk ah ngami cu akcang ah yei ci gui nei.

¹² Bawipa, ning ngai cicu hrilham na pek ci. Ngami cu na m’hni nak naw shawi ah mäih ah shung vong gui ci.