SAM 49 - Cho Bible Common Language 2016

Ng’bühmang nak Hlü aih ah Gu nak

¹ Chang nü naw ng’ya vä! Kho nü ung chang van,

² akzaw, akdäm, akpyam ang mang naw ngai vä.

³ Ka m’lung ngaih cu ng’htei khai, cüivai ciah thu lung ka pyen khai.

⁴ Kei cu thu thuuk lam ah ng’hlat ne, thuuk ciah amawng cu tingtäng tum ne ka m’dang khai.

⁵ Kyihkyawk nak ah khin a om ung phi, gaa gui naw ami na khaai ung phi, kä ka kyi khai.

⁶ Cun gui cu a büh-mang nak ngaih u ciah changshe gui la, khawh mah ne längtang ci kyak ci.

⁷ Chang naw amät kä gung hlawt khai; A hnun gui ah phu Khanpughi am kä pe hlawt khai,

⁸ A i ah kyasei ci ung chang ah hnun gui hleih vai cu küikyang aih ci.

⁹ Mikmi naw ng’cim hmun ung na k’phiawn vai, angtäi ghin nak gah sak vai ah kä mi pe hlawt ci.

¹⁰ Chang van ah hmuhmat cu, cüi vai ci phi sik ci, chang gu ang shekha phi sik ci, ami van naw ami khawh cu ami hta nau-am nawng pe shüt ci gui.

¹¹ Ami ng’cim hmun cu angtäi sei ami im ah kyak ci; A cun ung angtäi ah om ci gui, cun ung phi ami kho man cu ami ka ah kyak ci.

¹² Chang cu abäi mang nak naw sih nak ung kä phyawn hlawt ci; Ani phi sei sa ah mäih ah sik khai kyak ci.

¹³ Ami mät naw ami mät ngaih u ci gui cu a i ah ami kyak law ah teng vä, ami mät ah khawh ung bühmang ne om ci gui.

¹⁴ Ngami cu htome ah mäih ah khomü sei sik ci gui, sih nak cu ngami ah htoshäm ah kyak ci. Ng’düng ci gui naw ngami cu näng gui sei, ami pumsa cu ang ghit ah thuka ne, ami im awn ng’shawng ciah sih nak ah kho ah gawk ci.

¹⁵ Cun ung phi Khanpughi naw na k’phiawn khai; sih nak ah huham ung na hun khai.

¹⁶ Chang gui ng’büh mang law ne, khawh mah law pi ne ami kyak ung kä nami thüi vai;

¹⁷ Ani naw cun ah khawh cu a sih ung kä hteh püi hlawt khai. A khawh naw ng’cim hmun ah phi kä hteh püi khai.

¹⁸ A ghin yah ung abä m’cam ung phi ani cu näng nak om sei m’taam nak a gah ung phi,

¹⁹ Ani cu a pupa gui awn sih nak ung ng’hmuk khai gui, cun cu angtäi a hmüp nak ah kyak ci.

²⁰ Chang cu a hlüngtai nak naw sih nak ung ka kä hun ci; Ani phi sei sa ah mäih ah sik khai kyak ci.