SAM 47 - Cho Bible Common Language 2016

M’Gäi ciah Uktu

¹ Chang avan naw yei ne nami m’ya k’phyawk vä! M’lau ne ng’äi ne Khanpughi m’taam vä!

² Bawipa, A hlüngtai pibäih cu kyih aa vai kyak ci nei; ani cu küikyang ciah ghangpughang, M’dekhan avan uk ciah kyak ci nei.

³ Chang van ah gui ne; changpakhui van uk vai ah na m’düih gui ci.

⁴ Mi om nak vai kho ng’lei na ghü pe gui ne, am hni ah chang gui-am mang nak khawh k’peeih na pe gui ci.

⁵ Khanpughi cu a mang kiang ung hang kai ci, Bawipa a hteh sangung, yei nak m’lau k’aw la phyung heng tum k’aw cu ng’shan ci.

⁶ Ng’äi m’cu ne Khanpughi m’taam vä; Ng’äi m’cu ne mi ghangpughang m’taam vä!

⁷ Khanpughi cu m’dek ah khan avan ung ghangpughang nei; Ng’äi m’cu ne m’taam vä!

⁸ Khanpughi cu amang kiang theing ung ngok ci, Chang pakhui avan cuk ci.

⁹ Chang pakhui uk ci gui cu Abraham ah Khanpughi ah chang gui awn ng’bum ci gui nei. Gakap avan ah hlüngtai pi cicu ani nei; Ani naw m’gäi ne uk ci nei.