SAM 45 - Cho Bible Common Language 2016

Bämang ciah Ng’pui khah ng’äi

¹ Thu kyom gui ka m’lung ung be ci, Shin ah ng’äi cu ghangpughang-am ka guk nei. Ca akni ah gu thei ciah guk nak ah mäih ah, ka m’gawng m’lei cu kyasei ng’äi awm om ci.

² Nang cu na kyom pi bäih ci, na ng’thu thei pi bäih ci. Khanpughi naw angtäi sei hriham ning pek ci.

³ M’gäi ciah ghangpughang, na khim bah ä; Nang cu bämang ne na hlüngtai ci nei.

⁴ Düng nak la taga nak ah shung hmawk ah näng vai ah m’gäi nak ung ng’cum ne hteit ä. Na thagui naw ak kuikyang ah ning näng sak khai nei.

⁵ Na m’la gui cu ghat ci, cun gui naw na ga gui ah m’lung cu aat ci, changpakhui gui cu na kho kaa ah ng’zän ci gui.

⁶ Khanpughi ah ning pek ah uk nak kho cu a ngawi ah phi kä ng’pyi hlawt khai nei. Nang naw na chang gui cu taga nak awn na uk gui ci

⁷ Nang naw düng nak cu na m’hni ci, akshe cu na gen ci. Cun cu Khanpughi, na Khanpughi naw a ning ghü ah kyak ci, Ani naw a hei ghangpughang gui ah mä, bä pi ciah yeikyai nak awn ning shawi ci.

⁸ Na suisak cu tui ng’ui la sing ng’ui ah ng’ui ci; Tum ng’lam ng’äi awm ci gui naw m’vui ha awn cawh ah mang im ung ning khin nak ci gui.

⁹ Na m’tai kyang ung ng’lamihta gui ah ng’lung ah ka cu, ghangpughang gui ah hta hnumi gui ah kyak ci. Na mang kyang ah k’pat lam ung mangnu ng’düi ci, ani naw Onamen ghui pyü sui awi ci.

¹⁰ Ghangpughang ah mang hta, ka thu na ngai ä — Na chang gui la na mätyah gui cu m’hnih gui ä.

¹¹ Nang ah na kyom cu ghangpughang naw m’hni khai nei; Ani cu na bawi ah kyak ci, cun ah kyasei na ngaih vai.

¹² Tire chang gui naw pektak vai law püi khai gui, ng’bühmang ci gui naw na yei nak gui vai ah tha law nak khai gui.

¹³ Manghta ng’la cu mang im ung om ci — a ni cu kyom aih ci nei! Ani ah pänsam cu ghui pyai awn tah ah kyak ci.

¹⁴ Cüi ciah pänsam awn ani cu ghangpughang ah hteh püi ci gui. A hnu ah hnumi hta gui naw läk law ci gui, ngami phi ghangpughang ah ami hteh püi gui.

¹⁵ Yeikyai ng’häh leh ne ghangpughang ah mang im ah lut ci gui.

¹⁶ Nang, ka ghangpughang na hta da khai, ngami cu ghangpughang kya ne pupa pakhui m’düng kahi gui. Nang naw ngami cu khomdek avan uk ciah na pyang gui khai.

¹⁷ Kei ah ka ng’äi naw ngawi yä na ng’ming ghin sak khai, chang nü naw kho ng’län ung ning m’taam khai nei.