SAM 44 - Cho Bible Common Language 2016

Ana Shungvong vai ah Taigü nak

¹ O Khanpughi, Cau pui pui ak küikyang na bi lawh gui ah mawng cu kami pupa gui naw pyen u sei, kami hnga awn kami ng’yak ci nei:

² Chang hei gui cu na mät naw k’tääm gui ne, na chang gui ah ami kho cu na pyang ci Chang khuihei gui cu m’kyuk gui ne na chang gui cu na bühmang sak gui ci.

³ Na chang gui naw ami mät ah chim awn cun ah kho cu kä näng hlawt ci gui; Ami mät ah huham la k’thagui la na om ah mawng ang kheing sak nak awn, acun naw na m’hni nak gui cu dang sak ci.

⁴ Nang cu ka ghangpughang la ka Khanpughi ah na kyak ci, Nang naw na chang gui-am näng nak na pek ci.

⁵ Na mät ah huham awn kami gaa gui cu kami hnim ci.

⁶ Kamät ah li la kamät ah khim cu, na hun khai ah kä ka ngaih u ci;

⁷ Cun ung phi nang naw kami ga ah kut ung ka na hun gui ci, keimi na gen gui cicu na hnim gui ci.

⁸ Keimi naw angtäi sei kami ning m’tam khai, ngawi yä kami ning m’hlüngtai khai nei.

⁹ Cun ung phi tuhbäi nang naw na ng’hlah ta gui ne, na na hnim sak gui ci nei; Nang naw kami ga kap gui phi kä na düih püi ba gui ci nei.

¹⁰ Kami gaa gui dawng taak vai ah na ci gui ci sei, Ngami naw kami ka gui cu la yawp ci gui nei.

¹¹ Nang naw ami na kyih gui vai ah htome ah mäih ah na ap gui ne, a kho hei yung ah na na püi pawng sak gui ci,

¹² Nang naw nak chang gui cu api ah yoi ci sei, Ngami cu api phu nak ci gui.

¹³ Nang naw keimi ah khan ah na bi cu kami peileng gui naw hmu u neta, na päipih u ne, na gaih tu gui ci gui.

¹⁴ Chang pakhui gui ah ng’lung ah chang naw ana khui shui gui vai ah na bik ci, Ngami cu keimi ah khan ah ami lu tum ne mak ci gui.

¹⁵ Kei cu ang’täi sei kä ka yei ci, thui ng’aa nak naw na küm ci,

¹⁶ Cun cu ka gaa gui la na gen ci gui ah m’lepm’se nak la päipih nak ka ng’yak ah hmawk ah kyak ci.

¹⁷ Sing gui avan keimi ah khan ah kya pang sei phi, keimi naw kä kami ning m’hnih ci, keimi ung na ng’thukhän phi kä kami m’shet ci.

¹⁸ Keimi nang ah khan ah kä bekhüt ne kä kami om ci; Na thumkhän kä läk ne ka kami om ci.

¹⁹ Cun ung phi nang naw sa hnget ah ng’lung ah am gein ka ah na na nawng gui ci; a hmüp nak pi bäih ung phi na na nawng gui ci.

²⁰ Keimi naw kami Khanpughi khawihnah nak cu m’düm u ne, a kho hei ah Khanpughi kami taigü vai sü ung,

²¹ nang naw akcang ah na hmuk khai sü te, a i ah kyasei ci ung keimi naw düm ah kami ngaih cu nang naw na hmat ci.

²² Cun ung phi nang ah m’hnüt nak ung, keimi cu akphlüt ah na ngawn gui ci gui, aat ne kyih vai ah htome ah mäih ah na bi gui ci gui.

²³ Ng’shüm law ä, Bawipa! A i ah kyasei na ih ang? Tho law ä! Keimi cu kä na hnu en na gui lä ä.

²⁴ A i ah kyasei na na ng’thuh taak gui ang? Kami geinvai nak la khüikha nak cu kä na m’hnih en gui ä!

²⁵ Keimi m’dek ung kyu ne kami ng’deng ci nei, m’vut ung ng’zän ne kami ng’hnim ci nei.

²⁶ Kyum law ne na m’htei gui ä! Ng’täi ciah na m’hni nak awn na hun gui ä!