SAM 42 - Cho Bible Common Language 2016

Ca-uk Akhnih Nak ( Sam 42—72 ) Om K’Tu Chang ah Taigü

¹ Kigang naw tui gei tuihta ging co ne a shui ah mäih ah ka ning ging co ci nei Khanpughi aw.

² Ghing ciah Khanpughi, nang cu tui ah gha ne ka ning ging co ci nei. A i yah ung na ma ah hteit ne, ka ning khawihnah hlawt khai aw?

³ Ka gaa gui naw ak phlüt ah, “Na Khanpughi a hawi ang?” ci u sei, amü ak hnüüp kyap ne ng’phli tui kamü ngawi ei nak ci nei.

⁴ Yan ä ka gui ka shüm ba ung ka m’lung so ci nei, Kei cu chang hli awn atäng ah Khanpughi ah im ah ka hteh yah ung, ami m’hni ah hteh sak gui yeikyai ciah chang hli naw ng’äi m’cu ne, m’lau ne, Khanpughi m’tam ci gui nei.

⁵ A i ah kyasei kei cu ka thüi aih ang? A i ah kyasei kei cu ka khüikha aih ang? Khanpughi ka ngaih u khai nei, ka Hunbawi la ka Khanpughi cu ka m’taam ba mä khai nei.

^6-7 Om k’tu ah om ung ka m’lung so aih sei, ani täng ah ka m’lung ka m’hlat ci nei. Ani naw a yä nak ah tui ng’hnawk cu kei ah khan ah chah lawk ci; tuigai kuipak naw tui k’law ah mäih ah na lin ne, Tui soi tui ng’hmum cu Hermon la Mizara m’htung ungka Jordan tui ung a gawk law ah mäih ah kyak ci nei.

⁸ Bawipa naw kho hnüüp yah ung ng’täi ciah am hni nak cu m’dang khai nei, Cun ah kyasei kei naw mü ah ng’äi ka m’cu khai, ka ghin nak ah Khanpughi ah ka taigü khai.

⁹ Ka ng’zi nak Khanpughi ah thu ka pyen cu, “A i ah kyasei kei na na m’hnih ang? A i ah kyasei ka gaa gui ah shedam nak ung ka gein vai ang?”

¹⁰ Ngami ah shedam nak awn kei cu ka ng’deng ci nei, ngami naw pang ne na ng’shi u ne, “Na Khanpughi hawi ang?” cik ci gui.

¹¹ A i ah kyasei kei cu ka thüi aih ang? A i ah kyasei kei cu ka khüikha aih ang? Khanpughi ka ngaih u khai nei, ka Hunbawi la ka Khanpughi cu ka m’taam ba mä khai nei.