SAM 41 - Cho Bible Common Language 2016

Gawpyam ciah Taigü

¹ Dukhaih ciah chang tengkhen ci gui cu yeikyai nak om ci. Geinvai nak a gawk law ung ngami cu Bawipa naw m’htei gui khai.

² Ngami cu Bawipa naw shungvong gui ne, ami ghin nak pang gui khai; ani naw ami kho ung yeikyai sak gui khai. Ani naw ami ga gui ah huham ka ah kä nawng düt khai,

³ Ngami cu ami gawpyam ung Bawipa naw m’htei gui khai, Gai ba nak pe gui khai.

⁴ Kei naw, “Bawipa, nang ning hnu ng’tuk püi ne katnak ka bik ci nei; kei nam gein ne na m’gai ä” ka cik ci.

⁵ Ka gaa gui naw akshe ah na pyen u ne, ka sih, ka maih vai ng’ya hlü ci gui nei.

⁶ Kei na teng lawk ci gui cu kä ng’awi gi ci gui; Ngami cu ng’bum u ne, kei ah mawng akshe ah pyen ci gui, ami hteh nak päng ah ngak ci gui.

⁷ Kei na gen ciah chang gui avan naw, tumat la tumat ng’htau ne kei ah mawng pyen ci gui. Ngami naw akshe ah na bik khai gui ah ngaih-tüh ci gui nei.

⁸ Ngami naw, “Ani cu puishe ung gaw ci; a ih phak ungka kä tho ba hlawt khai nei,” cik ci gui.

⁹ Ka teihpüi ni pi, ka ngaih u pi bäih, ka ei vai phi k’pai ne ka ei püi, Naw phi ng’hlat ne na hnung’tuk püi ci nei.

¹⁰ Bawipa, na chimgein ä, gai nak phi na yuk pe law ä, ka gaa gui phi ka m’hlan ba gui khai nei.

¹¹ Ngami kei ah khan ah kä näng khai gui nei, Nang naw na na yei nak cu kei naw ka hmat khai nei.

¹² Kei cu ng’düng ci ka bik ci kyasei, nang naw na nam htei khai nei; Nang naw angtäi sei na ma ah na na k’pawm khai nei.

¹³ Israel Khanpughi, Bawipa cu m’taam nei! Tuhbäi la ngawi yä m’taam khah vä! Amen! Amen!