SAM 40 - Cho Bible Common Language 2016

M’Taam Nak ah Ng’äi

¹ Bawipa ah m’htei nak cu kei naw hnim gei ne ka ngäng ci nei; Ani naw na ngai ne, ka kyah cu ng’yak ci nei.

² Kei cu di nak ah khui la ng’än nai ung ka na khui ba ne, lung khan ah na m’düih ne nak phyawn sak ci.

³ Ng’äi thai kam cu vai ah ani naw na m’thei ci, mi Khanpughi m’taam nak ah ng’äi ah kyak ci. Shin hmuk ciah chang akda cu hmat law u ne kyikyawk neta, ngami cu Bawipa ung ng’ap khai gi nei.

⁴ Agup täng ah kä ng’hlat ne, kä khanpughi man kä khawihnah ne, Bawipa ung ng’ap ci gui cu yeikyai nak om ci nei.

⁵ O Bawipa, kami Khanpughi, Nang naw keimi ah khan ah akda na bi ci nei; Nang ah mäih a u kä om ci nei; Kei naw khei ne kä ka pyen hlawk yawp vai ah, cun gui cu da aih ci nei.

⁶ Nang naw ghutha la vawih peh cu kä na ng’ya hlük ci nei; Nang naw khiksei ngawn ne m’khih ne, kiang ung taih la kat phyawn nak ah ghutha cu kä na k’thäh ci nei. Cun ung phi na ng’thu ng’yak vai ah hnga cu na na pek ci nei,

⁷ Cun ah kyasei ka ning m’shan cu, “Kei shi ah nei; nang ah nam shüm thein nak cu thukhän ca uk ung om ci nei.

⁸ Ka Khanpughi, na ng’yak hlü bi vai cu ka m’hni aih ci nei! Nang ah na m’theithang cu ka m’lung kyong ung ka m’küm ci nei.”

⁹ Bawipa, na chang gui avan kami ng’bum nak ung, Na na hun gui ah mawng thu ni cu ka pyen khai nei. Kei naw kä ng’düm phung ne ka pyen vai cu nang naw na hmat ci nei.

¹⁰ Hun nak ah a mawng cu kei naw kä ka gim düt ci nei; Nang ah bekhüt nak la m’hteihtang nak cu angtäi sei ka pyen ci nei. Na chang gui van ah ng’bum nak ung na m’gein nak la na m’hni nak cu kä pyen ne kä ka om ci nei.

¹¹ Bawipa, na na chimgein nak cu kä ng’düm khai ah ka hmat ci nei. Na m’hni nak la na düng nak naw angtäi sei, na phyawn khai nei.

A Na M’htei vai ah Taigü

¹² Kei cu kä khei tai vai ah da ciah khüikha nak naw na k’cung ci nei. Ka katnak gui naw na pha sei a i kä ka hmu ba ci nei; ka katnak gui cu ka lu ung lumu ah phi da pi ci nei; kei ah ka thagui cu maih ci nei.

¹³ Bawipa, na hun ä, tuhbäi na m’htei ä!

¹⁴ Kei na ngawn khai ah pawng ci gui cu akbe ah shung u ne, thüi ng’a u sä. Kei ah geinvai ah phäh ah yeikyai ci gui cu ng’lat ba ne lü ng’a u sä.

¹⁵ Kei na gaih tuk ciah chang gui cu shuh ghawi ne, tüüp ne om u sä.

¹⁶ Nang ah lawk ciah chang avan phung cu yeikyai ne hüithaw u sä. Na hun nak ah hmawk ah m’hlüngtai ci gui phung naw, angtäi sei, “Bawipa cu hlüngtai aih ci nei” ci u sä.

¹⁷ O Bawipa, kei cu ka zoken, ka dukhaih ci, cun ung phi nang naw kä na na m’hnih ci. Nang cu ka Hunbawi la ka Khanpughi ah na kyak ci — Ang ghit ah na m’htei ä!