SAM 39 - Cho Bible Common Language 2016

Khüikha ciah Chang ah Ng’yu ba nak

¹ Kei naw, “Kei naw ka bi phung cu geing na ne ka bik khai nei, ka ng’thu awn phi kä ka cheishoh khai nei; Changshe gui ka pei ah ami om yah ung a i ng’thu phi kä ka pyen khai nei” ka cik ci.

² A düm ah ka om ci, m’khä ät ah phi kä ka ng’thu ci, akni ah mawng phi kä ka pyen ci! Cun ung phi ka yaica nak däm law pi k’täi ci.

³ Kei cu cäi ng’ä nak naw na näng ci, Ngaih tüh law pi ne, ka gein vai law pi ci, cun cu kä pyen ne kä ka om hlawt ci nei,

⁴ “Bawipa, a i güt kei ka ghing khai ang? A i yah ung ka sik khai aw? Ka ghin nak a i khin ung pyi khai ang, na m’thein ä.”

⁵ Ka ghin nak a i aih ah na tawi sak ci ang? Nang lam ah kei ah ghin nak cu a kho lä ah kyak ci nei. Akcang ah hni cim chang cu kho häi hlawk ah phi kä kyak ci nei,

⁶ pü püi hlawk ah phi kä kyak ci nei. Abi lawh phung phi a kholä ah kyak ci; khawh akda a kiam ung phi a u naw a mang vai ah kä ng’hmat ci,

⁷ O Bawipa, a i ka ngaih u khai ang? Nang bäng ka ning ngaih u ci nei.

⁸ Ka katnak avan ung nak phyawn ä, chang gu ang gui naw kä na gaih en tu u sä.

⁹ Kei cu adüm ah ka om khai, m’kha ät ah phi kä ka ng’thu khai, a cun ah ka om vai cu nang ah bi ah kyak ci nei.

¹⁰ Cun kawn ah kä na m’kat en ba ä! Na na tukthah ah hmawk ah ka si lawk khai kyak ci nei.

¹¹ Chang ah katnak cu züigen ne, na m’kat ci, Am hni gui cu m’hu ah mäih ah na m’di ci. Ak cang ah chang cu khokhi häi hlawk ah phi kä kyak ci!

¹² Bawipa, ka taigü na ng’yak pe ä, ka m’lau cu na ngaih pe ä. Ka kyah yah ung law ne na phawk law ä. Ka pupa gui ah mäih ah kei cu a shäng hta lawk ciah khin ah ka kyak ci.

¹³ Kei cu kä ka sih pha ung, yeikyai nak gui ka gah vai ah, na bä ni ka mät cu na nawng cang ä.