SAM 38 - Cho Bible Common Language 2016

Khüikha Ciah Taigü

¹ O Bawipa, m’lung she ne kä na m’kyuk-en ä!

² Nang naw na m’la awn na k’phleim ne, na nat sak ne, na na k’beeih taam ci.

³ Nang ah na m’lung she cu, kei naw ak tung ah ka m’neh ci nei; Ka cheishoh ah hmawk ah ka pum sa avan ung nat nak om ci nei.

⁴ Ka shetkat nak ah tui naw na k’plüm ne, kä näng vai ah phuih gih ci nei.

⁵ Kei ah ka gu ang ah hmawk ah ka khei gui cu thu ne hnai ci nei.

⁶ Kei cu ng’khun ne, khem ne, sui she sui ne ak hnüüp pum ka om ci nei.

⁷ Kei cu gaw ne mei ah ng’ling ne, ka si law hlük ci nei.

⁸ Kei cu gho ne ka dawih ci nei; ka m’lung cu cümbawng sei, kam neh m’awh ci nei.

⁹ O Bawipa, kei ah ka ng’ya hlü avan cu nang naw na hmat ci; Kei ah ka ng’hlaw ng’ei phi avan na ng’yak ci.

¹⁰ Ka m’lung ng’tum ne, ka thagui maih ne, ka mik phi kä m’dei ba ci nei.

¹¹ Ka gaw nak ah hmawk ah ka teihpüi, paw chang gui naw phi kä na et ba khai gui, ka kyong ung ka gui naw phi na hteh tak khai gui nei.

¹² Kei na ngawn hlük ci gui naw cun cuung ne na mah u ne; Na m’kat hlük ci gui cu akshe ah pawng ci gui nei. Ngami naw kä ng’düm phung ne kei cu na hnu ng’tuk püi ci gui.

¹³ Kei cu ak pang ah mäih ah kya ne, a i kä ka ng’yak ci, ak ang ah mäih ah kya ne, kä ka ng’thu thei ci.

¹⁴ Kei cu a i kä ng’yak ne, a u kä m’shang thei ciah mäih ah ka kyak ci.

¹⁵ Cun ung phi Bawipa, nang ung ka ng’ap ci nei; O Bawipa, ka Khanpughi, nang naw na na m’shang khai nei.

¹⁶ Ka thüi nak cu ka gaa gui naw kä na khih en nah u sä; Kei ka kiuk ng’täät yah ung kä khähghah en u sä!

¹⁷ Kei cu ka ng’lat ghep ghep ci kya neta, m’neh m’awh nak ka gah ci nei.

¹⁸ Ka katnak gui cu ka ng’yu ba ci nei, cun gui naw cäi ng’ä nak awn na be sak ci.

¹⁹ Ka gaa gui cu gai u ne, tha mah ci gui; Amawng kä om ciah na gen ciah chang gui cu da ci gui nei.

²⁰ Kei naw düng ci bi vai ka tha nak ah hmawk ah, akni cu akshe awn thung ciah chang gui naw, na hnu ng’tuk püi ci gui nei.

²¹ O Bawipa, kä na nawng en ä, ka Khanpughi kei awn kä ng’shawng en ä!

²² O Ka hun Bawipa, tuhbäi na m’htei ä!