SAM 37 - Cho Bible Common Language 2016

¹ Changshe ah hmawk ah kä nami ng’ä vai, cheishoh ciah hmawk ah kä nami m’thüi vai.

² Ngami cu m’ghaw ah chawng ah mäih ah maih ge ne, khu ah sih ah mäih ah si ge khai gui.

³ Bawipa ung ng’ap ne, akni bi vä, ng’dü ung ng’len ne, puui ne om vä.

⁴ Yeikyai nak cu Bawipa ung shui vä, Ani naw nami m’lung ah ng’yak hlü cu ning pe gui khai.

⁵ Bawipa am na pum pe ä; ani ung ng’ap ä, ani naw ning m’htei khai nei;

⁶ ani naw na düng nak cu hni lung lai ah mäih ah ning khang sak khai nei.

⁷ Hnim gei vai, Bawipa ah hnün thoh cu ging vä; khawh gah thei ciah chang ah hmawk la akshe bi ne näng nak gah ciah hmawk ah kä ng’ä ng’ai vä.

⁸ Kä na mi ng’ä ng’ai vai, kä nami m’lung she vai, ng’ä ai m’lung she nak cu, khüikha nak ah kyak ci.

⁹ Bawipa ung ng’ap cicu kho khän ne ng’len khai, cun ung phi changshe cu gawt ne täm khai.

¹⁰ Changshe cu a tuhbäi maih khai, a u naw shui ne kä hmu ba khai;

¹¹ cun ung phi am lung neim sak ci naw khaw päng khai, khawhmah ne yeikyai ding gei khai.

¹² Changshe naw changni cu hnu ng’tuk püi ne, m’kawng ne gen ci.

¹³ Cun ung phi Bawipa naw changshe cu gaih tuk ci. A i ah kyasei ci ung, ngami cu kä sho pha sei di khai gui ah ani naw hmat ci.

¹⁴ Changshe gui naw dukhaih ci la geinvai ci ami ngawn nak vai la düng ciah chang gui ami ah nak vai ah ami chim phawng ne, ami li koi ci gui.

¹⁵ Cun ung phi ami chim naw ami mät ngawn gui khai, ami li phi hnget khai.

¹⁶ Changni tumat ah khawh api cu, changshe avan ah khawh ah ta bä pi ci.

¹⁷ A i ah kyasei ci ung Bawipa naw, changshe gui ah tha gui cu shum sak ne changnigui cu shungvong gui khai.

¹⁸ Bawipa naw ang thu ngai ci gui cu, teng ne m’htei gui sei, khaw cu ngami ah khaw ah ngawi yä kyak ci.

¹⁹ Ngami cu khaw a zaw ung phi kä khüikha khai gui, tui a shet ung phi kä ami ei vai da khai gui.

²⁰ Cun ung phi changshe gui cu sih yawp khai gui; Bawipa ah a gaa gui cu chei ah maih ah thum ne, mei khu ah mäih ah maih khai gui.

²¹ Changshe naw pu neta kä thung ah om ci, cun ung phi changni naw ng’khai lang ne, chang-am pe tak ci.

²² Bawipa naw hriham am shum phyuk ah chang naw khaw päng ci, cun ung phi Bawipa naw a plah taam cu gawt ne k’täm khai.

²³ Changni cu Bawipa naw a hteh nak vai lam shüm ne, Ani yei nak cicu shungvong ci,

²⁴ Ngami cu ami ng’täät ung phi kä di khai gui, Bawipa naw m’tho ba gui khai.

²⁵ Kei cu ka ghi lawk ci, aksho ka ghing lawk ci, Changni Khanpughi naw nawng düt ci, ci la, ani ah hta nau ng’zoi ne ei ci, cicu kä ka hmu man ci.

²⁶ Ani cu angtäi sei chang-am pe taak, pu m’hnih ciah kya ne, a hta nau gui naw m’shum phyuk nak gah ci gui.

²⁷ Akshe nawng ne, akni bi vä, nami hta ng’shon cu angtäi sei ng’dü khaw ung om khai gui nei;

²⁸ Bawipa naw düng cicu m’hni ne, bekhüt ciah ak chang cu kä nawng ci, Ani naw angtäi sei ngäng gui ci, Cun ung phi changshe ah hta ng’shon gui cu, gawt ne k’täm gui khai.

²⁹ Düng ciah chang gui cu khaw päng u ne, ngawi yä pui m’ca khai gui.

³⁰ Changnicu ang thu cüi vai ci, angtäi sei taga ci gui.

³¹ Ani naw Khanpughi ah ang thukhän pang ne, am lung ung chum ci, a i sang ung phi kä ng’pai phung ci.

³² Changshe naw changni cu ng’mün ne ngawn vai ah tha nak ci.

³³ Cun ung phi Bawipa ani cu gaa ah huham kaa ah kä nawng düt ci, ami chum ung phi kä m’kyuk gui khai.

³⁴ Bawipa ung ngaih u nak ta ne, ang thum khen cu läk vä; ani naw ng’dü khaw ning pe gui ne, ning m’taam khah gui khai; changshe ak täm cu nang mi naw nami hmuk khai.

³⁵ Hnü ät ung m’ghämce ciah chang she tumat cu ka hmat ci, Ani naw Lebanon ah cedar sing ghing ah mäih ah avan cu k’she nak ci.

³⁶ Cun ung phi ani ka phlän kawn ah, ani cu ah kä om tu ba ci; kei naw shui ba ne phi kä ka hmu ba ci.

³⁷ Changnicu teng vä, chang düng cu hmu vä, dim deeih sei om cicu ng’shon bang ci nei;

³⁸ Cun ung phi changshe gui cu avan di yawp ci gui, ami hta ng’shon gui phi ng’pyi ci gui.

³⁹ Ng’düng ciah chang cu Bawipa naw hun ne, khüikha nak ung phi shung vong ci.

⁴⁰ Bawipa naw ngami cu m’htei gui ne, gung gui ne; changshe ah kut ung phyawn gui ci, ngami cu ani ung ng’yii ci gui.