SAM 36 - Cho Bible Common Language 2016

Chang ah Shetkat nak

¹ Shetkat nak cu changshe ung thu pyen ne, am lung ung htek ci. Ani naw Khanpughi hnu ng’tuk püi ne kä kyih aa ci.

² Amät naw amät m’hlüngtai ne, yei nah ne, Khanpughi naw a katnak cu kä hmuh pe ne, kä m’kyuk khai ah ngai ne yei ci.

³ Ani ah ang thu cu ng’thu she ah kya ne, hleei nak awn be ci; Ani naw cüivai nak la nikiom nak cu kä bi ba ci.

⁴ A ih ng’zän nak ung phi akshe bäng ngaih-tüh ci; Akni phung a i kä bik ci; akshe phung kä hnu nak ci.

Khanpughi ah Ni Kiom nak

⁵ Bawipa, na m’hni nak cu khankho ah khüt ne, Na bekhüt nak naw khomik pha ci nei.

⁶ Na düng nak cu m’htung küi ah mäih ah ng’tai ne, na taga nak cu tuinu ah mäih ah thuk ci nei. Chang la ak ghing avan cu nang naw na m’hteihtang ci nei.

⁷ O Khanpughi, nam hni nak cu küikyang aih ci nei! Chang ah hta naw na ng’phia hnim cu yii ci gui nei.

⁸ Na bühmang nak ah ei cu na phü sak gui ne, na ni kyom nak ah tui cu na awk sak gui ä.

⁹ Nang cu ghin nak avan ah ang yung ah na kyak ci, nang ah akdei ung keimi naw akdei kami hmuk ci.

¹⁰ Nang ning hmat ci gui ah khan ah na m’hni nak cu ng’täi sak ne, düng ci gui ah khan ah na ni nak cu be sak ä.

¹¹ Chang k’awm ci naw kä na näng ne, changshe naw kä na k’täm en sä.

¹² Changshe gui cu kyu ne ng’zän ci gui nei, ami ng’zän nak ung ka, kä tho ba hlawt ci gui nei.