SAM 35 - Cho Bible Common Language 2016

A Nam Htei Vai ah Taigü

¹ O Bawipa, na hnu ng’tuk püi ci gui cu, hnu ng’tuk püi ä, Na ng’tuk püi ci gui cu ng’tuk püi gui ä!

² Na shawi kawt ne na k’htau na ne Na na gung khai ah kyum law ä.

³ Kei nak täm lawk ci gui cu na k’htei pawng shäng ne, m’hlat gui ä! Na na hun vai ah shaitak nak na pe ä.

⁴ Kei na ngawn khai ah pawng ci gui cu, dishum ne thui ng’a u sä, Kei na hnu ng’tuk püi ci gui cu, ng’hlat u sei, ng’gawgan u sä!

⁵ Ngami cu khokhi ah zon ah ko ah mäih ah kya u sei, Bawipa ah khanchang naw k’täm gui sä.

⁶ Bawipa ah khanchang naw gawt ne aktäm gui yah ung, ami lam cu hmüp ne ng’nawk sä!

⁷ A mawng kä om ciah ami na pha nak vai cuun cung u ne, m’vam phi ak thuk ah co ci gui nei,

⁸ Cun ung phi kä ami hmat ah didap nak naw pha gui khai nei, ami mät ah cuun ung ami mät awk u ne, ami mät ah m’vam ung ami mät kyak khai gui nei!

⁹ Cun kawn ah Bawipa ah hmawk ah ka yei khai nei; Ana hun ah hmawk ah ka yei kiai khai nei.

¹⁰ Ka m’lung kyong avan awn Bawipa ma ah ng’thu ka pyen vai cu, “Nang awn täng ci a u kä om ci. Nget ciah kut ungka ak ghawi na shung ci, m’gäi ciah kut ungka ak pyam na hun ci.”

¹¹ Changshe gui naw na hnu ng’tuk püi u ne, kä ka hmat ah a mawng ama nak bün ci gui nei.

¹² Akni ka bi phung cu akshe awn na sah u sei, ka ngaih u vai maih ci nei.

¹³ Cun ung phi ngami ami nat law ung kei cu sui she sui ne, ei hlawi ne, kawp ne, ka taigü ci.

¹⁴ Ngami cu teihpüi, phäi nau ah mäih ah ka taigü pe gui ci. Anu khaih na ne, omdam ciah mäih ah ng’bawk ne, omdam ne ka om ci.

¹⁵ Cun ung phi kei ka gein vai yah ung ami van yei ci gui, nak bui u ne, na gaih tuk ci gui. Chang lam k’hteit gui naw, na pung beeih ci gui, na plawh sheh ci gui nei.

¹⁶ Shum khem ci ami gaih tu ah chang ah mäih ah ami hahtui ne, na gen ci gui nei.

¹⁷ Bawipa, na teng düt ne a i güt na om khai ang? Ngami ah ng’tuk nak ung na gung ne; Shin ah kawng gui ah kut ung ka, ka hnun nak phyawn ä!

¹⁸ Na chang gui ah ng’bum nak ung ka ning m’hlüngtai khai nei; chang van ah ma ah ka ning m’taam khai nei.

¹⁹ Ami gai pyen ne na gaih m’gin ne ka di vai ah, ka ga gui cu kä näng-en sak gui ä. A mawng ma a i kä om sei na thüi nak ci gui naw, ka thüi sangung kä na mik m’ghi en ah u sä.

²⁰ Ngami cu ng’khawt nak ah ng’thu kä pyen ci gui; Ding gei sei om ciah chang gui ah mawng cu a hlü hlü ah m’hleeihlak ci gui.

²¹ Ngami naw m’lau ne na hawh u ne, “Nang ah na bi lawh cu kami hmuk ci nei” cik ci gui.

²² Cun ung phi Bawipa nang naw avan na hmuk ci nei, ka omdüt ten a, kä na hteh en ta ä!

²³ O Bawipa, tho law ne kei cu na shung ä; ka Khanpughi, ng’düi law ne, kei ah ka mawng cu na m’htei pe ä.

²⁴ O Bawipa, nang cu na düng ci nei, cun ah kyasei changni ah na pyang ä, ka ga gui naw kei cu kä na gaih m’gin u sä.

²⁵ “Keimi naw ani kami ghawt ci nei! Kami ng’yak hlü be pyi ci nei,” cine ami mät kä kya en u sä!

²⁶ Kei ah ka geinvai ah phäh ah yei gaih ci gui cu, didap ne gawgan u sä; Kei ah ni pi ciah pyen ne, ng’taam ci gui cu, lü ng’a ne, thüi sei u sä.

²⁷ Kei na hmuh hlük ciah chang gui naw kei cu nak bün u ne, Ng’leng leng ne yei ne m’lau ne, “Bawipa cu hlüng tai aih ci nei, Ak changshäm gui ah näng ah hmawk ah ani cu yei kyai ci nei” cik ci gui.

²⁸ Na ng’düng nak cu kei naw ka ng’shäu khai nei, ak hnüüp ng’län ung ka ning m’taam khai nei.