SAM 34 - Cho Bible Common Language 2016

Khanpughi ah Ni nak M’taam Nak

¹ Kei naw angtäi sei Bawipa ka yei nak khai nei; kä düm phung ne ka m’taam khai nei.

² A bilawh gui ah hmawk ah ka m’taam khai nei; ami shedam nak ah chang van naw ngai ne, yei u sä!

³ Kei awn atäng ah Bawipa ah küi kyang nak cu ng’shäu vä; Aming cu atäng ah mi m’tam khai ne.

⁴ Bawipa ah taigü ngä sei, ani naw nam shang ci; ka kyihkyawk nak gui ung na m’hlawt ci.

⁵ Ami shedam nak ah chang gui ani teng ne, yei ci gui; Ngami cu kä cäi ng’ä phung khai gui.

⁶ Am gein kaa ci gui naw ani cu khü u sei, m’shang gui ci; Ami khüikha nak avan cu phyawn gui ci.

⁷ Bawipa m’tam khah ciah chang gui cu, ak khan kho chang gui naw ngäng ci gui, kyihkyawk nak nüng ung gung ci gui.

⁸ Bawipa a i hlawk ah ani cu shui shüm ne hmat vä. Ani ung phyawn nak hmuk cicu yei kiai ci nei.

⁹ Bawipa cu tam khah vä, ak chang gui avan naw, ani ngai ciah chang cu ang yak hlü avan küm ci nei.

¹⁰ Kawng hlui cu a ei vai kä om se a cawi ung phi, Bawipa läk ciah chang cu ni kyom nak kä shum khai nei.

¹¹ Hmaw chang ka teihpüi gui law vä, Na ngai law vä, Bawipa tamkhah ah mawng ka ning m’thei gui khai nei.

¹² Yeikyai ne ghin nak nami ng’yak hlü naw? Ak sho ghing ne nami pui m’ca hlü naw?

¹³ Akshe ah kä nami ng’thu vai, nami hleei kä nami pyen vai.

¹⁴ Akshe nawng ne, akni nami bi vai; Na m’lung kyong avan nawn tha na ne dim deeih nak na bi vai.

¹⁵ Bawipa naw düng ciah chang gui cu teng khen gui ci, ami ng’khü phi ngai pe gui ci.

¹⁶ Cun ung phi ak she bi ci gui cu hnu na gui ci, ami sih law ung phi m’hnih gui ge ci.

¹⁷ Düng ciah chang gui naw Bawipa cu ami khü ung ngaih pe gui ci; ami khüikha nak avan ung gung gui ci.

¹⁸ Thüi kyap ci gui cu Bawipa naw ng’et püi gui ci, A ngaih u nak mäih cicu hun phyawn ci.

¹⁹ Changniung khüikha nak akda gawk thei ci, cun ung phi Bawipa naw avan ung hun phyawn ci;

²⁰ Bawipa naw akbe ah am htei ah kya ne, a guh tumat phi kä hnget ci.

²¹ Changshe cu akshe naw ngawn khai; Ng’düng ciah chang thüi nak ci cu, m’kyuk nak om khai.

²² Bawipa naw ak chang gui cu hun gui khai, Ani ung hteit ne ng’shung ci gui cu, ani naw piantham gui khai.