SAM 33 - Cho Bible Common Language 2016

M’Taam nak ah Ng’äi

¹ Nangmi, düng ciah chang van naw, Bawipa ah bi ah hmawk ah yei ne m’lau vä; Ani ngai ciah chang van naw m’tam vä.

² Bawipa cu tingtäng tum ne hlüngtai vä. Gui awn pyan gui tum ne, ng’äi m’cu vä.

³ Ama ah ng’äi thai m’cu vä, Tingtäng akni pi ah tum ne, yei ne m’lau vä.

⁴ Bawipa ah ang thu cu ng’düng ci, a bi lawh phung cu khäng htek ci.

⁵ Bawipa naw düng ci la taga ci phung cu m’hni ci; Ng’täi ciah am hni nak naw khomdek cu be sak ci.

⁶ Bawipa naw khankho cu ang thumkhän awn tüisho ci, Hni, cha, aisi gui phi ang thu awn tüisho ci.

⁷ Ani naw tuinu gui cu hmun ät ung kyum sak ci; Tuili küi phi khai ne li ät ah büi ci.

⁸ Khomdek avan naw Bawipa khawihnah vä! Kho a ka ah chang avan naw m’taam khah vä!

⁹ Ang thu m’gawng ung ka khomdek cu ng’tüisho ci, ang thum khän ung ka apäng dang lawk ci.

¹⁰ Bawipa naw changpakhui gui ah tängpang cu haih ci; ami pawng püi gui phi m’hlat yawp ci.

¹¹ Cun ung phi ani ah pawng püi cu kho ung ng’län ne ang bü nak cu angtäi ah om ci.

¹² Khanpughi, Bawipa nak ciah pakhui cu yeikyai nak om ci; Ak chang ah a ghü ah pakhui cu yeikyai nak om ci!

¹³ Bawipa naw khankho ah om ne yuk teng ne, hnicim chang avan cu hmuk ci.

¹⁴ Khomdek khan ah om ci avan cu, a uk nak ung om ne teng gui ci.

¹⁵ Ani naw ami m’lung ngaih avan pyan pe gui ne, ami bi phung cu hmat gui ci.

¹⁶ Ghangpughang naw huhamah ciah gamaw awn näng nak kä gah ci, Bawi gaakap naw ghat ciah k’thagui awn m’khüt nak kä hmuk ci.

¹⁷ Ng’tuk nak ah ng’se gui ung näng nak kä om ci, Bä ciah ami thagui naw kä hun gui hlawt ci.

¹⁸ Ani ngai ci la ng’täi ciah am hni nak ung ng’ap cicu Bawipa naw ngäng ci.

¹⁹ Ani naw sihnak ung ka hun gui ne, kho ah shet sang ung ghin nak pe gui ci.

²⁰ Mi ngaih u nak cu Bawipa ung om ci; Ani cu na shungvong gui ci la nam htei gui ciah kyak ci.

²¹ Mikmi cu ani ah hmawk ah mi yei ci; aming theing ung mi ng’ap ci.

²² Bawipa, nam hni nak cu keimi ung om sä, Nang cu kami ning ngaih u ci nei.