SAM 32 - Cho Bible Common Language 2016

Ng’Yu nak la M’geinsei nak

¹ A katnak m’geinsei nak om ci la, a cheishoh ng’yu ba ciah chang cu yeikyai nak om ci.

² Bawipa ah m’kat nak ah hma nak kä om ne, m’thüi m’khang nak ung am hlawt ah chang cu yeikyai nak om ci.

³ Kei ka hma nak kä ka ng’yu ba ah a kyak ung, kei cu hnüüp lüng ne kyap ne ka cüm ci.

⁴ Bawipa, amü a hnüüp kei cu na nam kyuk ci nei; ka thagui cu avan ket yawp ne, chakho ah m’hutui a kawi ah mäih ah kyak ci nei.

⁵ Na ma ah ka katnak gui cu ka ng’yu ci nei; ka cheishoh nak cu kä ka m’zih ci nei. Katnak ka ng’yu khai ah ka k’bäi kawn ah ka cheishoh nak avan na na m’geinsei ci nei.

⁶ Cun ah kyasei, na changnigui cu, ami ng’yak hlü ah khin ung taigü khai gui nei. Tuinu ng’güüt ne a law, law ung phi, kä k’pha gui khai nei.

⁷ Nang cu ka ng’thuh nak ah na kyak ci; Nang naw khüikhai nak ung na na hun khai; Na hun nak ah mawng m’lau ne ng’äi ka m’cu khai, cun cu na na shungvong ah hmawk ah kyak ci.

⁸ Bawipa naw, “Na hteh nak vai ah lam ka ning m’thei khai; ka ning m’thein khai, ka ning m’hnuh khai.

⁹ Ang ciah ng’se ah mäih ah kä nami kyak vai, The cu a nep vai ah am gawng ung gui awn khit ne kaih ah kyak ci” cik ci.

¹⁰ Changshe gui cu geinvai khai gui, cun ung phi Bawipa ung ng’ap ci cu, ng’täi ciah am hni nak awn shungvong ci.

¹¹ Nangni düng ciah chang gui, Bawipa ah bi ah hmawk ah yeikyai vä. Ani ngai ciah chang gui yei ne m’lau vä.