Biblia Todo Logo
Bib sou entènèt

- Piblisite -

SAM 31 - Cho Bible Common Language 2016


Khanpughi Ngaih u ne Taigü

1 Bawipa, na na shungvong vai ah nang ah ka lawk ci nei; Kä na di maih sak phung en ä. Nang cu düng ciah Khanpughi nei; ka taigü ci, na hun ä!

2 Na ngai ä! Tuhbäi na hun ä! Ka ng’yii nak awi na shung ä; ka shung nak awi na hun ä.

3 Nang cu ka ng’yii nak la ka ng’shung nak ah na kyak ci; na shaitak ah mäih ah kei cu na chuiso ne, nam shüm ä.

4 Kei am ami na cun ung na phyawn sak ä; Kyihkyawk nak ung phi na shung vong ä.

5 Kei cu na na m’htei nak vai ung ka om ci nei. Bawipa, nang naw na na hun khai nei, nang cu bekhüt ciah Khanpughi nei.

6 Kä Khanpughi khawihnah ci gui cu nang naw na gen ci, cun ung phi kei cu nang ung ka ng’ap ci nei.

7 Ng’täi ciah m’hni nak ah hmawk ah kei cu ka yeikyai khai nei. Kei ah ka yaica cu nang naw na hmuk ci, kei ah ka khüikha cu nang naw na hmat ci.

8 Ka gaa gui naw ami na näng vai ah nang naw kä na m’awng ci, ka ng’yak nak hlü ah ka hteh vai ah ng’pängye nak na na pek ci.

9 Bawipa, na chimgein ä, khüikha nak ung ka gawk ci nei. Ka kyah nak aih ka mik deek ci nei; kei cu avan ah ka ng’yai ci nei.

10 Kei cu thüi sei nak naw nak täp ne, awk guh nak naw ka ghing nak tawi sak ci nei. Ka khüikha nak avan awn ka tha ng’yai ne, ka guh gui phi thum’dawk ci nei.

11 Ka gaa gui avan la aktungpi ah ka im ng’gi gui naw na yawshe nak ci gui, kei na hmat ci gui naw na kyih ci gui; Lam ung kei ami na hmuh ung dawng ci gui.

12 Kei cu chang si ah mäih ah chang avan naw, na m’hnih ci gui; kei cu ghawh vai ah k’am k’she ah mäih ah ka kyak ci.

13 Gaa akda naw ami na hngen shai nak cu ka ng’yak ci, kyih she vai naw na koi ci nei. Kei na hnu ng’tuk püi khai gui ah pawng püi ci gui nei. Kei na ngawn khai gui ah ng’ge ci gui nei.

14 O Bawipa, cun ung phi nang ka ng’ap ci, Nang cu ka Khanpughi nei.

15 Kei cu angtäi sei na na tengkhen ci, ka gaa gui ah kut ung na hun ä, Ngami naw na dukdeiu nak ci gui.

16 Na changshäm cu m’gein ne na teng ä; Ng’täi ciah na m’hni nak awn na hun ä.

17 Bawipa, ka ning khü ci nei; kä na lüng’a sak-en ä. Chang omshe gui cu lüng’a sak gui ä; Ngami cu sihnak ah khaw ah düm ah hteh sak gui ä.

18 Hleeihlak ci gui, chang k’awm ci gui, chang kä hmu tuk ci gui, düng ciah chang, akshe ah pyen ci gui, a düm ah om u sä.

19 Nang ning m’taam ci gui-am na gim pek gui cu, cäicat vai ah na ni, nang ung ng’ap ci gui, a i hlawk ah na shungvong gui cu, chang avan naw hmat ci gui nei.

20 Ngami cu chang gui ah cicum nak ung la ga gui ah bi nak ung phyawng khai gui ah nang naw ng’yii nak ung na thup gui ci.

21 Bawipa cu m’taam nei. Nak koi ne ami na tuk yah ung kei ah hmawk ah am hni nak am dang cu, cäicat vai kyak ci nei.

22 Kei cu ka kyik ci, ama ung ka, nak tääm khai ah ka ngai ci. Cun ung phi anam htei vai ah ka ng’khü yah ung, ka kyah cu ng’yak ci nei.

23 Bawipa cu m’hni vä, bekhüt ciah ak chang van naw, Bekhüt cicu Bawipa naw shungvong ci, cun ung phi chang ah ng’shei ci cu, amät ah om m’kyuk ci.

24 Bawipa ngaih u ciah chang avan, thamah vä, khüi ghaat vä.

Cho Bible Common Language © Bible Society of Myanmar, 2016.

Bible Society of Myanmar
Swiv nou:



Piblisite