SAM 28 - Cho Bible Common Language 2016

A nam htei vai ah Taigü

¹ O Bawipa, ka ng’shung nak, ka ning khü ci nei. Ka kyah aw cu na ngaih pe ä! Nang naw kä na na m’shan ah a kyak ung, kei cu, sih nak kho ah hteit ci gui ah ng’lung ah ka gawk tuk khai kyak ci nei.

² Na nam htei vai ah ka m’lau ung, Na pum im theing lam ah ka kut ka k’shäng ung, na ngaih pe ä.

³ Changshe gui, akshe bik ci gui — ang awi ah thu ne, ami m’lung kyong ah m’thüi ci gui awn atäng ah kä na m’kyuk-en ä.

⁴ Ami bi pyi gui ah hmawk la ami chei ah katnak ah hmawk ah m’shet gui ä. Ami om ih ah ciah m’kat gui ne, ami bilawh ah ciah thung gui ä.

⁵ Bawipa naw a i a bi lawh, a i a tüi pyan cu ngami naw kä hmat thei ci gui nei. Cun ah kyasei ngami cu ani naw m’kyuk gui ne, ngawi güt m’di gui khai nei.

⁶ Bawipa cu m’tam khah nei, ani naw a nam htei vai ah ka ng’zoih cu ng’yak ci.

⁷ Bawipa naw na shung ne na vong ci; Ani cu ka ngaih u ci. Ani naw kei cu nam htei ne, na yei sak ci; yeikyai nak ng’äi awn kei naw ka m’taam ci nei.

⁸ Bawipa naw ak chang gui cu k’tha pe gui ne; a ghü ah ghangpughang cu khüighat sak ne hun ci.

⁹ Bawipa, na chang gui cu hun gui ä, na chang gui cu hrilham pe gui ä. Ngami ah htoshäm ah kya ne, angtäi sei m’hteihtang gui ä.