SAM 27 - Cho Bible Common Language 2016

M’Taam Khah nak Taigü

¹ Bawipa cu kei ah kak dei la kei na hun ciah kyak ci; a i phi kä ka kyih khai. Bawipa naw kyihshe nak phung ung na shung vong ci, kei a i phi kä ka kyih phung khai.

² Kei na tuh ne, na ngawn hlük ciah changshe gui cu, ng’lat ne kiuk khai gui.

³ Gaa kap mo ng’nän naw ami na koi ung phi kei cu kä ka kyik khai; Gaa gui naw ami na tuk ung phi, Khanpughi ung ka ng’ap kheng geng khai.

⁴ Kei naw a mawng tumat Bawipa ah ka ng’zoi ci, Tumat bäng ka ng’yak hlü ah kyak ci: Cun cu Bawipa ah im ung ghin ah chuih ka om vai la ani nak ung cäicat ne, alam shüm nak ka hmuh vai ah kyak ci.

⁵ Geinvai yah ung ani naw a im ung na ng’yii sak ne; pum im kyong ah phyawn vai ah na thup ci, hlüng ciah lung tung khan ah na taih ne na phyawn ci.

⁶ Cun ah kiasei nak koi ciah gaa gui ah khan ah ka näng khai. A pum im kyong ah yei ne m’lau ne, khawihnah nak ka vawipet khai; Ng’äi ka m’cu khai, Bawipa ka m’tamkhah khai.

⁷ Bawipa, ka ng’khü cu na ng’yak pe ä! Na chimgein ne na m’shang ä!

⁸ Nang naw, “Law ne na khawihnah ä” na ci ung “Ka lawk khai nei, Bawipa” cine ka ning m’shang ci.

⁹ Kä ka ning hmuh vai ah kä ng’thup-en ä! Kei ah khan ah kä m’lung she-en ä; Na changshäm cu kä ng’hlah ta-en ä. Nang naw kei cu na nam htei ci, kä na hteh tak-en ä, kä na nawng-en ä, O Khanpughi ka hunbawi.

¹⁰ Ka nu la ka pa naw ani na nawng ung phi, Bawipa naw nam htei khai nei.

¹¹ Bawipa, na ng’yak hlü ka bi vai ah, nam thei ä, phyawn nak ah lam düng na m’shüm ä. Kei cu ka gaa da aih ci nei.

¹² Hleei hlak shedam nak awn na ng’tuk püi ciah ka gaa gui ah ng’lung ah kä na nawng-en ä.

¹³ A shui ah ka ghin yah ung Bawipa ah ni nak hmuh vai ah ka ghing khai ciah ka hmat ci nei.

¹⁴ Bawipa ngaih u ä, yum ä, khüi ghaat ä, Bawipa ngaih u ä.