SAM 26 - Cho Bible Common Language 2016

Chang Ni ah Taigü

¹ O Bawipa, kei cu düng ci bi ne, nang ung akbe ah ka ng’ap ci kyasei, Kei täng ah na bi lawh vai nei.

² Bawipa, na ng’shi ne, na m’nüm ä; Ka ng’yak hlü la ka ngaih-tüh gui cu yuk m’khoi m’cha law ä.

³ Ng’täi ciah nang ah m’hni nak naw na m’shung ci; Na bekhüt nak naw angtäi sei lam na m’shüm ci.

⁴ Chang thüi gui awn atäng ah kä kami om ci, Thuvi chang gui awn kä kami bi ghawm ci.

⁵ Chang ghing she cu kä ka m’hni ci, chang om kaa cu ka zeeih ci.

⁶ Bawipa, kei cu ka kut m’si ne, katnak kä a om ah mawng ka m’dang ci, mang kyang veing ne ka khawihnah ci nei.

⁷ M’hlüngtai nak ah ng’äi m’cu ne, cäicat vai ah na mawngma avan ka pyen ci nei.

⁸ O Bawipa, na om nak ah im la, na bämang nak ah hmun cu ka m’hni ci nei.

⁹ Cheishoh ci gui awn atäng ah kä na m’di en ä, Chang ngawn ci gui awn na ng’shawng sak ä.

¹⁰ A phlüt ah akshe bik ci gui cu, angtäi sei ei k’aw ci gui nei.

¹¹ Cun ung phi, kei läi cu, düng ci ka bik ci, kei cu na chimgein ne, na hun ä!

¹² Kei cu kyihshe ci phung ka phyawn nak ci, ak chang hli ah ng’lung ah Bawipa cu ka m’taam khah ci.