Biblia Todo Logo
Bib sou entènèt

- Piblisite -

SAM 25 - Cho Bible Common Language 2016


Ana M’shüm Hnuh vai la Ana Shung Vong vai ah Taigü nak

1 O Bawipa nang ah, taigü ne ka ng’zoi ci nei;

2 Ka Khanpughi, nang ung ka ng’ap ci nei. Thui ng’a nak ung na k’phyawn ä; Ka gaa gui naw kä na näng en u sä!

3 Nang ung ng’ap ci gui ah khan ah thui ng’a nak kä om en sä, Ning küknet püi ci gui cu thui ng’a u sä.

4 O Bawipa na lam cu nam thein ä; na hmuh hmat sak ä.

5 Nang düng nak ung, na ng’yak ka hlü ah om vai ah na m’thei ä, Nang cu ka Khanpughi, na na hun ci, nang ung angtäi sei ka ng’ap ci nei.

6 Na shüm ä, O Bawipa, Cau püi nam dang ah na chimgein nak la ng’täi ciah nam hni nak awn na shü ä.

7 Ka nong yah ung ka cheishoh nak la ka kat kawng nak cu na m’gein ä. Ng’täi ciah na m’hni nak la nam’gein nak awn kei cu na shüm ä, Bawipa!

8 A i ah kyasei ci ung Bawipa cu ng’düng ci, nik ci, Ani naw cheisho ci gui ami hteh nak vai lam m’thei gui ci.

9 Am lung neim ciah chang gui lam düng m’shüm gui ci, Amät ah ng’yak hlü phi m’thei gui ci.

10 A shaitak ngai ne, ang thukhän läk ci gui cu, bekhüt nak la m’hni nak awn lam shüm gui ci.

11 Bawipa, na shaitak m’khän ä, Ka cheishoh nak nam gein ä, ngami cu da ci gui nei.

12 Bawipa chang m’sui ci gui naw, ami läk vai ah lam cu ng’thei ci gui nei.

13 Ngami cu angtäi sei bühmang khai gui, ami hta gui naw kho khäm khai gui.

14 Bawipa cu ang thu läk ciah chang gui ah teihpüi ah kyak ci, ani naw ang shai pek cu ngami ung küm sak ci.

15 Ang täi sei a nam htei vai ah kei naw Bawipa cu, ka dan ci nei, Ani naw di nak vai ung ka na gung ci nei.

16 Bawipa, kei täng ah ng’hlat law, kei na chimgein ä, a i ah kyasei ci ung, kei cu ka keiu ci, ka yai ci.

17 Ka ng’ä ai nak gui ung kaa, na hüi sak ne, ka cümbawng nak gui ung ka nak phyawn ä.

18 Ka ng’zocho nak la ka yaica nak cu na m’htei ne, ka katnak gui avan cu nam gein ä.

19 Ka gaa a da aih cu na hmuh peä; a i hlawk ah ami na gen cu na hmat peä.

20 Na shungvong ä, na hun ä, shedam nak ung na gung ä. Nang ah phyawng ne ka lawk khai nei.

21 Kani nak la ka düng nak naw kei cu na ngäng sä, a i ah kyasei ci ung kei cu nang ung ka ng’ap ci nei.

22 O Khanpughi, na chang gui Israel gui cu, ami khüikha nak avan ung k’phyawn gui ä.

Cho Bible Common Language © Bible Society of Myanmar, 2016.

Bible Society of Myanmar
Swiv nou:



Piblisite