SAM 22 - Cho Bible Common Language 2016

Asa M’neh ciah Kyah la M’Taam nak ah ng’äi

¹ Ka Khanpughi, ka Khanpughi, a i ah kyasei na na nawng ang? Kei cu na na m’htei vai ah kyap ne ka ng’khü ci nei, cun ung phi a i kä dang lawk ci nei.

² Kho hnüüp yah ung kei naw ka ning khü ci nei, ka Khanpughi, cun ung phi nang naw kä na na m’shang ci; mü ah phi kä ning khü ci, cun ung phi kä ka ng’düm hlawt ci.

³ Nang cu ng’ciim ciah mang kiang ung ngoawk ciah, Israel gui ah m’taam ah na kyak ci.

⁴ Kami pupa gui naw ning ngaih u ci gui; Ning ngaih u, u se, na hun gui ci.

⁵ Ngami naw ning khü u sei, nang naw nak phyawn gui ci; Nang ning ngaih u ne, kä thüi sei ci gui.

⁶ Kei cu chang ah kä ka kya ci; m’kyiit ah ka kya ci, chang ah päipih, shemshai ah ka kyak ci!

⁷ Na hmuk ciah chang phung naw na gaih tu u ne, ami m’lei m’teh ne, ami lu tum ci gui.

⁸ Ngami naw, “Nang cu Bawipa ung na ng’yung ci nei,” A i ah kyasei kä a ning hun ang? Bawipa naw a ning m’hni ah a kyak ung, a i ah kyasei kä a ning m’htei ang? cik ci gui.

⁹ Nang naw kei cu akni ah na na ng’tüi sak ci, ka zit hta nah ung na na m’htei ci.

¹⁰ Kei cu ka ng’tüi law ge ung nang ung ka ng’yung ci, nang cu angtäi sei ka Khanpughi ah na kyak ci.

¹¹ Kei awn kä ng’shawng-en phung ä! Zaica nak naw na k’et ci, kei na m’hei khai ah a u kä om ci nei.

¹² Gaa akda naw sei gui ah mäih ah kya ne na koi ci gui; ngami ami van naw Bashan sei nget ah mäih ah kya ne na k’fi ci gui.

¹³ Ngami cu m’ngaw ne nget ciah phongkawng ah mäih ah kei lam ah ang ci gui.

¹⁴ Kei ah ka thagui cu maih ci nei, m’dek ung cüp ciah tui ah mäih ah ng’phiüi ci. Ka guh gui avan cu ka ng’htak ba ci nei, Kam lungsin cu khoi chap ah maih ah pyawn ci nei.

¹⁵ Kei ah ka gawn cu m’vut ah mäih ah chawng ne, kam’lei phi ket ci. Nang naw ka sih vai ah m’dek ung na na nawng ci nei.

¹⁶ Changshe gui naw na koi u ne, ui ah mäih ah ng’na ne, ka kut kho ung na htui ci gui nei.

¹⁷ Ka guh gui avan cu dang yawp ci, ka gaa gui naw na teng u ne na gaih m’gin ci gui.

¹⁸ Kei ah ka sui gui cu, m’shüih tawk u neta, ami mät naw ng’tei ci gui.

¹⁹ O Bawipa, kei awn kä ng’shawng-en ä! Kei na nam htei khai ah law hlah ä!

²⁰ Kei cu chim ung nak phyawn ne; ka hnun gui cu ui gui ah kut ung nak phyawn ä.

²¹ Kawng gui ah m’gawng ung nak phyawn nä; Shin ah se nget gui ung kei nak phyawn khai kä om ci nei,

²² Nang ah bi ah mawng cu ka chang gui-am ka m’thein gui khai nei; Ngami ah ng’bum nak ung ka ning m’taam khai nei.

²³ “M’taam ngak vä, Bawipa ah changshäm gui aw! Chang m’sui vä, Jakob ah hta ng’shon gui aw! Khawihnah vä, Israel chang gui aw!

²⁴ Ani naw dukhaih cicu kä nawng ci, ami geinvai nak cu kä nawng ci; Ani naw kä ng’hlah ta gui ci, am htei gui vai ami ng’khü ung m’shan gui ci.”

²⁵ Kei naw chang hli ah ng’lung ah nang cu ning m’taam ne; Ning khawihnah ci gui ah ma ah ka shaitak ah mäih ah ka ning pek khai.

²⁶ Dukhaih ci gui naw ami phü ah ei khai gui; Bawipa ah lawk ci gui naw ani cu m’taam khai gui. Ngami cu angtäi sei bühmang u sä!

²⁷ Chang avan naw Bawipa cu shüm khai gui. Khaw cawi päng ah ka, ani ah ng’hlat lawk khai gui; Chang pakhui avan naw khawihnah khai gui.

²⁸ Bawipa cu ghangpughang ah kyak ci, changpakhui avan cu uk ci.

²⁹ M’gäi ciah chang gui avan cu ama ah kawp khai gui; Chang neng gui avan cu ak ka ah ng’bawlawk khai gui.

³⁰ Malam ah hta ng’shon gui naw a khuut bik khai gui; Chang gui naw Bawipa mawng cu lawk ciah ng’shon ung pyen khai gui.

³¹ “Bawipa naw ak chang gui hun gui ci” ci cu, kä ng’tüi phak ci gui-am phi m’thein gui khai gui.