SAM 21 - Cho Bible Common Language 2016

Näng ah Hmawk ah M’hlüngtai

¹ O Bawipa, nang naw thagui pek ci sei, ghangpughang cu yeikyai ci nei; Nang naw näng sak ci sei ani cu lünlawi ci nei.

² Am lung ah ng’yak hlü cu nang naw na pek ci, Ak taigü phi na ngaih pek ci.

³ Nang naw küikyang ciah hriham law püi ne, ghui lukhu phi alu ung na k’bün ci.

⁴ Ghin nak ning yoi sei na pek ci, ang’shäi ghin nak la angtäi ghin nak ah kyak ci.

⁵ A bämang nak cu chün ci, nang ah m’htei nak awn kyak ci; Nang naw ming thang nak la chün nak na pek ci.

⁶ Nang ah hrilham cu ani awn atäng ah angtäi om ci, nang ah hmai awn ani cu yeikyai nak be ci.

⁷ Ghangpughang naw a hlüngtai säih Bawipa ngaih u ci, Bawipa ah ng’täi ciah m’hni nak awn ani cu angtäi sei phyawng khai.

⁸ Ghangpughang naw a gaa gui avan cu chum gui khai, ani naw ani gen ci phung cu chum khai.

⁹ Ang dang law hnüüp ung ani naw mei cang ah mäih ah kya ne m’di gui khai. Bawipa naw am lungshe nak awn m’zaw gui sei, mei naw phi kiawm shi gui khai.

¹⁰ Ami hta ng’shon tumat phi ka om ba khai, Ghangpughang naw ngawn gui yawp khai.

¹¹ Ngami cu ami mät ah ngaih ah tängpang u ne, Ani cu hnu ng’tuk püi ci gui, cun ung phi kä näng khai gui.

¹² Ani naw am la awn bü ne kaap gui ne ng’hlat ne dawng sak gui ci.

¹³ Bawipa, ghaa ciah na thagui ah hmawk ah kami ning m’hlüngtai ci nei! Keimi naw ng’äi m’cu ne, na hlüngtai nak cu kami m’taam ci.