SAM 2 - Cho Bible Common Language 2016

Khanpughi ah Ghü ah Ghangpughang

¹ A i ah kyasei changpakhui gui naw ng’tuk vai ami ng’bü ang? A i ah kyasei chang gui naw m’yihthuh ne ami bi ang?

² Ami ghangpughang gui ng’tuk so u ne, uk ciah chang gui ng’sük u ne, Bawipa hnu ng’tuk püi ci gui, A ghü ah ghangpughang cu hnung’tuk püi ci gui.

³ Ngami naw, “Ami na uk nak gui ka mi ng’pät khai nei. Ami na shum nak gui cu mi k’phyan khai nei” cik ci gui.

⁴ Khankho mangkiang ung ngok cicu gaih ci, Bawipa naw ngami cu päipih gui ci nei.

⁵ Ani naw m’lung she ne khän gui ne, m’gäi ne kyihkyawk sak gui ci.

⁶ Ani naw, “Zion, ka khomhtung theing khan ah, kei naw ka ghangpughang cu ka m’düih ci nei” cik ci.

⁷ Ghangpughang naw, “Bawipa ah thu m’shäk cu kei naw ka ng’shäu khai. Ani naw kei am, “Nang cu ka ning htapa nei, Tuhngawi kei cu nang ah Pa ah ka kyak ci nei.

⁸ Na na ng’noih vai, changpakhui avan nang am ka ning pek khai; Khomdek avan cu nang ah ka vai nei.

⁹ Nang naw ngami cu, m’si hteipawng awn uk gui ne; M’dek am gep ciah mäih ah na m’shet gui khai.”

¹⁰ Nangmi ghangpughang gui cuivai vä, Khomdek uk ci gui shin ah thu cu geing na vä.

¹¹ Bawipa cu kyih ne a khuut bi vä; Ng’hlet ne a ma ah kawp vä;

¹² Kä cun ung ani ak yaang ah m’lung she law sei, Nangmi ang ghit ah nami si lawk khai. Am lungshe nak awn ang ghit ah nami maih khai, Ani ung yii ciah chang phung cu yeikyai nak om ci nei.