SAM 19 - Cho Bible Common Language 2016

A Tüisho ung Dang ciah Khanpughi ah Bämang nak

¹ Thein ciim ciah khomik naw Khanpughi ah bämang nak cu dang sak ci! M’kim ciah ng’lei do naw abi lawh cu ng’dang sak ci!

² Hnüüp ät naw hnüüp ät ba vai cu ng’shäu ne; mü ät naw mü ät ba vai cu pyen ci.

³ Thu ng’ma, thu ng’lung kä pyen, a i k’aw kä ng’yak ung phi;

⁴ Ngami ah thushäu cu kho ah ka avan ung hteit ci, m’dek ah khan avan ung ng’yak nei. Khanpughi naw khankho mik ung khohni ah im pyang ci;

⁵ Ani cu kho ngawihta ung chumah khai ah pamihta ah mäih ah yei ne, Khahta gai ciah dawng ah mäih ah lawk ci.

⁶ Ani cu khomik ah vang mawng ah lut law ne, vang mawng ah ng’phlän ne hteit ci. Ani ah a ng’lung ung a i phi kä ng’shung thei ci.

Bawipa ah Thukhän

⁷ Bawipa ah thukhän cu kümbe ci; thagui ak thai pek ci. Bawipa ah thumkhän htangkha ci, kä cüivai cicu cüivai sak ci.

⁸ Bawipa ah thumkhän gui cu düng ci, läk ciah chang cu yeikyai sak ci. Bawipa ah thumkhän taga ci, m’lung kyong ung lung’lang nak pek ci.

⁹ Bawipa kyih aa cu nik ci, kho ng’län ung ng’täi ci. Bawipa ah ng’thumcha cu taga ci; angtäi sei vang ci.

¹⁰ Cun gui cu ng’ciim ciah ghui ah m’hni pi vai kya ne, tui ciah khoitui ah tui pi ci.

¹¹ Cun gui naw na changshäm kei-am hmuh hmat nak na pek ci; A cun ka ngaih ah hmawk ah kei cu m’cümhnah nak ka gah ci.

¹² Ani ah hma katnak cu a u naw kä hmuk ci; ng’thup ciah katnak ung ka nak phyawn ä, Bawipa!

¹³ Hmat lang ne katnak ung ka, na gung ä; Cun gui naw kä na uk-en u sä. Cun kawn ah kei ka kümbe khai nei, sheka ne cheishoh nak ung na m’hlawt ä.

¹⁴ Ka thu la ka m’lung ngaih cu nang ah dou thei vai ah kya sä, O Bawipa ka ng’yii nak la ka Hunbawi!