Biblia Todo Logo
Bib sou entènèt

- Piblisite -

SAM 18 - Cho Bible Common Language 2016


David ah Näng nak ah Ng’äi
( 2Sml 22:1-51 )

1 Ka ning m’hni aih ci nei, Bawipa! Nang cu ka thagui ah na kyak ci.

2 Bawipa cu kei ah lung, kei ah vongpang, Kei ah Hunbawi, kei ah Khanpughi, ani cu kei ah phyawn nak ah kyak ci. Ani naw shawi ah mäih ah na shung ci; Ani naw nang vong ne nak phyawn ci.

3 Bawipa cu ka khü ci nei, Ani naw ka ga gui ah kut ung na hun ci nei. Bawipa kam hlüngtai ci nei.

4 Sihnak ah kyihnak naw na kiung ne; Dinah ah tui ng’hnawk cu khan ah long ci nei.

5 Sihnak ah kyihnak naw na kiung ne; ng’cim hun naw cun awn na phak ci nei.

6 Ka cümbawng yah ung Bawipa cu ka khü ci nei; na m’htei khai ah Khanpughi cu ka k’thäh ci nei. A pum im kyong ah om ne ka k’aw cu ng’yak ci; ka kyah cu ngai ne, na m’htei ci nei.

7 Khanpughi cu m’lung she sei, khomdek thüng ne, khomhtung ng’nawi gui cu ng’hlet ne ng’ng’tum ci gui.

8 A hna ung mei khu thawk ne, a shai ung mei m’lei tawt ne, mei cak ng’ling ci.

9 Ani naw khomik ng’kup sak ne kyum law sei, a kho ka ah ng’mei le ng’thoot ci.

10 Ani cu Cherubim ng’cum ne zong ne; Khokhi ah ng’phya khan ah hteihton ci.

11 Ani cu hmüp khui awn ng’shung ne; Khong’mei shah la tui k’thuuk naw ng’vong ci gui.

12 Ama ung pyü ciah akdei k’thuuk naw ng’vong ci gui. Gäilung la mei cak cu dang law ne, ng’meile cu shet sak ci.

13 Bawipa cu khankho ah ng’hmum kyeek sei, Hlüngtai pi ciah ak aw cu ng’shan ci.

14 Am la awn kaap ne gaa gui cu k’täm gui ne, kho lai läp awn gawt ne dawng sak gui ne, kho lai läp awn gawt ne dawng sak gui ci.

15 Bawipa, na gaa gui cu hawh gui ne, m’lungshe ne na m’ngawn gui ung tuinu ah ka ng’lei cu dang ne, m’dek ah khan cu ng’hmawng ci.

16 Bawipa cu khankho ah kya law ne, nak pang ne, tui thuuk ung ka kei cu na khui ba ci.

17 Huham ah ciah gaa gui la kä m’khüt vai ah na gen ci gui ah kut ung ka, Ani naw na hun ci.

18 Kei cu ka khüikha yah ung, ngami naw na ng’tuk püi ci gui, cun ung phi Bawipa naw na shung vong ci.

19 Kyih ng’ä nak ung na m’htei ne, na hun ci, cun cu ana yei nak hmawk ah kyak ci.

20 Bawipa naw düng nak ka bi ah hmawk ah ng’chuh na pek ci; katnak kä ka bi ah hmawk ah hriham nak’be ci.

21 Kei naw Bawipa ah thukhän cu ka läk ci, Khanpughi hnu na ne kä ka ng’hlat ci.

22 Kei naw a thukhän avan cu läk ne; a thumkhän cu kä ka nawng ci.

23 Kei ung hma nak kä om ciah ani naw hmat ci, cun ah kyasei cheishoh nak kä om ciah ani naw hmat ci, cun ah kyasei cheishoh nak kä om khai ah ka m’htei ci.

24 Kei naw ng’düng nak ka bi ah hmawk ah ani naw ng’chuh na pek ci. Kei ung katnak kä om ciah ani naw hmat ci.

25 O Bawipa nang ung bekhüt ci gui ah khan ah nang cu na bekhüt ci; kümbe ci gui ah khan ah akbe ah na nik ci

26 Ng’ciim ci gui ah khan ah na om ng’ciim ci, changshe gui ah khan ah na om kaa ci.

27 M’lung neim ci gui cu na hun gui ci, m’ghänce ci gui cu na ng’neim sak ci.

28 O Bawipa, nang naw akdei na na pek ci, Ka hmüp nak cu na dei sak ci.

29 Ka gaa gui ka tuk nak vai ah thagui na na pek ci, Ami ng’shung nak näng nak vai huham na na pek ci.

30 Khanpughi ah bi cu kümbe ci! Ang’thu cu ng’düih nak ah kyak ci. Ani shui ne ng’yii ci gui ah hmawk ah shawi ah kya ci.

31 Bawipa bäng cu Khanpughi ah kyak ci; Khanpughi bäng cu mi ng’shung nak ah kyak ci.

32 A cun ah Khanpughi naw thagui na ghaat sak ne, Ka hteh nak lam phi düng sak ci.

33 Ka khaw cu kigang ah khaw ah mäih ah na yaang sak ne, m’htung lai ah phawng ne na ng’düih sak ci.

34 Ng’tuk bi vai ah na m’thei sei, m’htung pi bäih ciah li cu ka kawt hning ci.

35 O Bawipa, na shungvong ne, na na hun ci; Na k’pat kut naw na bä khäk sak ne, Na huham nak naw na phyawn gai sak ci.

36 Nang naw khih pawn nak ungka na na shum ci; Kei kä ka zu ng’kya phung khai.

37 Kei naw ka gaa gui cu k’täm ne ka pha gui ci; Kä ka m’di gui pha ah chuih kä ka ng’düm khai.

38 Kei naw ngami cu ka geih gui ci, ngami kä tho ba hlawt ci gui; ngami cu ka kho ka ah ng’zän ci gui.

39 Nang naw ng’tuk bi nak vai k’thagui na pek ci sei; ka gaa gui ah khan ah ka näng ci.

40 Ka gaa gui cu na dawng sak gui ci; Na thüi nak cicu kei naw ka m’di ci.

41 Ngami kyap ne ng’hui ci gui, cun ung phi u naw kä m’htei gui ci, Bawipa khü ci gui, cun ung phi kä m’shang gui ci.

42 Kei naw ka güt gui ci, ngami cu m’vut ah mäih ah kyak ci gui, kho khi naw zon gui ci. Lam ung om ciah ng’awt ah mäih ah kei naw ka ghawt gui ci.

43 Na ng’küüt neet püi ciah chang gui ung na na hun ci; Pakhui päng ka uk khai ah na na pyang ci. Kä ka hmat man ah chang phi ka chang ah kya ci.

44 Kho hei chang gui ka ma ah kawp ci gui; Ka mawng ami ng’yak ung na ngai ci gui.

45 Ngami cu ami k’tha maih sei ami ng’yii nak ung ka ng’hlet ne lut lawk ci gui.

46 Bawipa cu ghing ne om ci kyasei, kei ah ka ng’shung nak cu hlüngtai sä! Na hun ciah Khanpughi ah bämang nak cu ng’shäu vä.

47 Ka gaa gui ah khan ah näng nak cu ani naw na pek ci nei; pakhui gui cu kei ah ka ah om sak ci,

48 ka gaa gui ah kut ungka na gung ci. O Bawipa, ka gaa gui näng vai na na pek ci, changshe gui ah kut ung na na shungvong ci.

49 Cun ah kyasei pakhui van ah ng’lung ung ka ning m’taam ci; m’hlüngtai ne ka ning ng’äi ci.

50 Khanpughi naw küikyang ciah näng nak cu a ghangpughang am pek ci; Ani naw a ghü ah chang, David la a hta ng’shon am ng’täi ciah am hni nak cu angtäi ah m’dang ci.

Cho Bible Common Language © Bible Society of Myanmar, 2016.

Bible Society of Myanmar
Swiv nou:



Piblisite