SAM 17 - Cho Bible Common Language 2016

Changni ah Taigü David ah Taigü

¹ O Bawipa, düng ci lam ah om ne, ka ng’hui cu na ngaih peä; Ka kyah nak cu na dou pe ne, na m’htei ä! Düngnak awn ka taigü cu na ngaih peä.

² Nang naw kei lam ah om ne na m’khoi m’chak khai, a i ah kyasei ci ung nang naw hman cicu na hmat ci.

³ Nang naw ka m’lung na hmat ci. Khomü ung kei ah na lawk ci; Nang naw kei cu akbe ah na na cet ci, cun ung phi kei ung ng’zak hlü akshe a i kä na hmuk ci.

⁴ Kei cu chang hei gui ah mäih ah akshe ah kä ka thu ci; kei naw na thumkhän cu ka ngai ci, kä chang man ah lam cu kä ka läk ci.

⁵ Kei cu nang ah lam ung angtäi ah ka hteit ci, lam kä ka pleng phung ci.

⁶ O Khanpughi na na m’shang ci kyasei, nang ah ka taigü ci nei; kei täng ah ng’hlat law ne, ka thu cu na ngaih peä.

⁷ Cäicat vai ah na m’hni nak cu m’dang ne, na hun ä; Nang ning yii ne ka gaa gui ungka, ka phyawng ci nei.

⁸ Na mik cang awn na tengkhen ä; na ng’phia hniim ung na thup ä,

⁹ Changshe gui ah ngawn sheh nak ung nak phyawn ä. Sihnak ah gaa gui naw na khaai ci gui nei;

¹⁰ Ngami ung chimgein nak kä om sei, m’gäi ne ng’thu ci gui.

¹¹ Ngami naw na kiung ci gui nei, ka ng’hlah nak päng ah, ami na buh tawn nak vai däät ne na teng ci gui nei.

¹² Ngami naw phongkawng ah mäih ah, kei cu na ngäng u ne, phyit ne na ei hlük ci gui nei.

¹³ Bawipa, kyum law ä! Ka gaa gui cu ng’tuk püi gui ne m’htin gui ä! Changshe gui ung ka, na chim ghaat awn na hun ä;

¹⁴ Ami ghin yah ung ami ng’yak hlü düt ah kyak ciah chang gui ung ka na hun ä. Ngami ah hmawk ah na gim pek gui ah yaica nak awn m’kyuk gui ä; cun gui cu ami hta gui ah hmawk ah ng’büh khai nei, Ami hta ah hta gui-am phi nawng pe shüt khai gui nei.

¹⁵ Cun ung phi kei naw ka ning hmu gui khai, kei cu chei khai ah a i kä ka bik ci; kei ka thawh law ung na na om püi nak naw kei cu na yeikyai sak khai nei.