SAM 16 - Cho Bible Common Language 2016

Yum ne Taigü nak

¹ O Khanpughi, na ngäng ä, ka phyawn vai ah nang ung ka ng’ap ci nei.

² Bawipa ka ning pyen nak ci, nang cu ka ning Bawipa nei; kei ung om ciah akni phung avan cu nang ungka lawk ci nei.”

³ Bawipa ah bekhüt ciah ak chang gui cu a i hlawk ah küikyang ci ang! Kei ah hlüngtai pi ciah yeikyai nak cu ngami awn atäng ah om ci nei.

⁴ A hei khanpughi ah lam ghü ciah chang gui cu, ami mät ah khüikha nak akda gah ci gui nei. Ngami ah vawihpeh cu kei naw kä ka dou khai nei; ngami ah Khanpughi cu kä ka khawihnah khai nei.

⁵ Nang, Bawipa cu kei ung om ciah avan ah na kyak ci, ka ng’yak hlü avan phi na na pek ci; ma lam ka ghin nak cu nang ah kut ung om ci.

⁶ A i hlawk ah cäicat vai ang, nang ah na m’cümhnah cu; Ni aih ci gui nei!

⁷ Bawipa cu ka m’hlüngtai ci, lam a nam shüm ah hmawk ah, mü ah phi ka m’lung naw kei cu na m’thein ci.

⁸ Kei cu angtäi sei Bawipa ah ma ah ka om ci; ani naw na et sei, kei cu a i naw kä na k’hnün hlawt ci.

⁹ Cun ah kyasei yeikyai ne, ka ngaih kei naw m’tam ne ngaih gep ci.

¹⁰ A i ah kyasei ci ung nang naw sih nak ah huham ung ka na na phyawn ci. Kei naw bekhüt ne na khuut ka bik ci, Nang naw sihnak ah kho ung kä na na nawng khai nei.

¹¹ Nang naw ghin nak ah lam cu na nam shüm khai; Na na om püi nak naw yeikyai nak awn na be sak ne, angtäi hlimtui nak phi law püi ci.