SAM 147 - Cho Bible Common Language 2016

M’gäi ciah Khanpughi M’taam nak

¹ Bawipa cu m’tam nei! Mi Khanpughi ng’äi ne m’tam cu ni aih ci nei; Ani m’tamkhah cu bä nak la düng nak ah kyak ci nei.

² Khanpughi naw Jerusalem mang gaw cu co ba ci; akho hei ah ami k’täm gui cu law püi ba gui ci.

³ Ani naw am lung kyong di ci gui cu gai sak gui ne, ami leim cu hlawp pe gui ci.

⁴ Ani naw aisi gui cu khei gui ne, ami ming sui gui phäh phäh ci.

⁵ Dämduh ne küikyang cicu mi Bawipa ah kyak ci; Ani ah cüivai nak cu a u naw kä nüt dawng hlawt khai.

⁶ Am lung neim sak cicu thawh sak ne, changshe cu güüt ne m’dek ung m’shän ci.

⁷ M’tam nak ah ng’äi cu Bawipa am m’cu vä; mi Khanpughi cu m’tam ne tingtäng tum vä.

⁸ Ani naw khomik cu kho ng’mei awn küm ci, khomdek khan ah kho yuk aa sak ci, kho ng’zuung ung khumghaw pyo sak ci.

⁹ Ani naw khisa gui cu ami ei vai pe gui ne, vang’ak ah hta gui ami m’lau ung tu m’bei gui ci.

¹⁰ Ani ah lünlawi nak cu gai ciah ng’se ah kä kyak ci, m’gäi ciah gakap ah kä kyak ci;

¹¹ Ani ah lünlawi nak cu, ani m’tamkhah ciah chang la ng’täi ciah am’hni nak ung yum htek ciah chang gui ah kyak ci.

¹² O Jerusalem, Bawipa cu m’tam ä! O Zion, na Khanpughi cu m’tam ä!

¹³ Ani naw na m’kawt gui cu k’pang ne khän htek sak ne, na chang gui cu hriham pe gui ci.

¹⁴ Ani naw na kho gui cu k’pang ne ngäng ne, htang m’guh akni pi na phü ah ning ei sak ci.

¹⁵ Ani naw khomdek am thumkhän pe ne, a pyen phung cu ang ghit ah bik ci.

¹⁶ Ani naw khüi toi cu yih ah mäih ah dung sak ne, khüi cu m’vut ah mäih ah ng’phiang sak ci.

¹⁷ Ani naw lung gin ah mäih ah gäi cu yuk chah law sei; A yuk chah ah ak khing cu a u naw kä khan hlawt ci!

¹⁸ Cun kawn ah thumkhän bi ne, tui m’kiang gui cu piawn sak ci; Ani naw kho cu khi sak sei, tui cu long thei ci.

¹⁹ Ani naw ak chang gui am ang thu m’khäh gui ne, Am shüm thein nak la a thukhän cu Israel gui am pe gui ci.

²⁰ Ani naw shin gui cu chang khuihei ung kä bik ci; ngami naw ani ah thukhän kä hmat ci gui. Bawipa cu m’tam nei!