SAM 146 - Cho Bible Common Language 2016

Khanpughi Hunbawi M’Tamnak

¹ Bawipa cu m’tam ä! Bawipa cu m’tam ä, ka mumcha!

² Kei ka ghin ah chuih Bawipa cu ka m’tam khai nei; ka ghin nak avan ung ka Khanpughi ah ng’äi ka m’cu khai nei.

³ Hnicim chang bawi cu kä nami ngaih u vai; hnicim chang naw kä ning hun gui hlawt khai.

⁴ Ngami ami sih ung khomdek ung hteit ba ci gui Cun ah hnüp ung ami pawng püi avan cu düt ci.

⁵ Yeikyai nak om ciah chang cu, m’htei gui khai ah Jakob ah Khanpughi, Bawipa a Khanpughi ung ng’yung ciah kyak ci.

⁶ Cun ah Khanpughi cu, khankho la khomdek ni, tuinu ni, a cun gui ung om ci gui avan cu tüisho ciah kyak ci. Ani naw angtäi sei a shaitak cu k’pang ci;

⁷ Ani cu ami shedam nak ah chang täng ah om ci. Ei ah cawi ci gui am ei m’bei gui ci. Bawipa naw thawng kyum ci gui cu m’hlawt gui ci.

⁸ Amik m’dauh gui cu m’dei sak gui ci. Zu ng’kyak ci gui cu zu chang tu gui ci; düng ciah ah chang gui cu m’hni gui ci.

⁹ Ani naw mi kho ung om tuk ciah khin gui cu shungvong gui ci; Ani naw hmeinu gui la hmei hta gui cu m’htei gui ci, cun ung phi changshe gui cu ami di vai ah m’shet gui ci.

¹⁰ Bawipa cu kho ng’län ung ghangpughang ah kyak ci nei. O Zion, Na Khanpughi naw kho ng’län ung uk khai nei. Bawipa cu m’tam nei!