SAM 145 - Cho Bible Common Language 2016

M’taam Nak ah Ng’äi

¹ Ka Khanpughi la ghangpughang, na dämduh nak ah mawng cu ka ng’shäu khai nei; kho ng’län ung ka ning m’hlüngtai khai nei.

² A hnüüp tä ka ning yei nak khai nei; kho ng’län ung ka ning m’tam lä khai nei.

³ Bawipa cu dämduh ci kyasei, ak hlüngtai ah m’tamkhah vai nei; a dämduh nak cu kä hmat hlawt yawp vai kyak ci nei.

⁴ Nang ah na bi phung cu ang shon päng ung m’tam vai nei; chünla ciah na hnün thawh cu ngami naw shäu khai gui nei.

⁵ Ngami naw na bämang nak la na chünla nak cu pyen khai gui nei, cäicat vai ah na bi lawh gui ung ka m’lung htek khai nei.

⁶ Chang gui naw m’gäi ciah na bilawh gui cu pyen khai gui, kei naw na dämduh nak cu ka ng’shäu khai.

⁷ Ngami naw bä ciah na ni nak ah mawng pyen u ne, na m’gein nak ah a ni ah mawng ng’äi m’cu khai gui.

⁸ Bawipa cu m’hni nak la chimgein nak ah kyak ci, kä m’lungshe yäi ci, ng’täi ciah m’hni nak awn be ci.

⁹ Ani cu avan ah khan ah nik ci, tüisho avan cu chihna ci.

¹⁰ Bawipa, na tüipyan avan naw ning m’tam khai nei, Na chang gui van naw ning yei nak khai gui nei.

¹¹ Ngami naw na bämang nak ah na huham cu pyen u ne, Na m’gäi nak cu ngak khai gui nei.

¹² Cun ung kyasei m’gäi ciah na bi lawh la bämang chünla ciah na uknak kho cu chang van naw hmat khai nei.

¹³ Na uknak cu ng’täi ci, kho ng’län ung ghangpughang ah na kyak ci. Bawipa cu a shaitak ung bekhüt ci; a hnünthawh nak phung ung chimgein nak om ci.

¹⁴ Khüikha ciah chang gui cu m’htei gui ci; zu ng’kyak ci gui cu zu chang ba gui ci.

¹⁵ Ak ghing avan naw ngaih u ne ning teng ci gui, Ami cawi yah ung nang naw ei na m’bei gui ci.

¹⁶ Nang naw ngami am ng’büh ne changvan naw ami chüm vai ah na pe gui ci.

¹⁷ Bawipa cu a bilawh nak avan ung düng ne, a hnünthawh nak avan ung m’gein ci.

¹⁸ Ani naw ani khü ci gui la m’lung neim nak awn khü ci gui cu k’et gui ci.

¹⁹ Ani m’tamkhah ci gui ah ami ng’yak hlü cu petak gui ci; Ani naw ami kyah cu ng’ya ne hun gui ci.

²⁰ Ani m’hni ciah chang phung cu ani naw shungvong ci, cun ung phi changshe gui cu m’di gui khai nei.

²¹ Bawipa cu angtäi sei ka m’tam khai; A tüisho avan naw ani ah ming theing cu kho ng’län ung m’tam khah vä.