SAM 144 - Cho Bible Common Language 2016

Näng nak ah Hmawk ah Ghangpughang naw Khanpughi Yei nak ci

¹ Ka ng’yii nak Bawipa, ka m’tam ci nei! Ani naw ng’tuk bi vai phi na m’thei ne ga tuk vai phi na pawng püi ci.

² Ani cu ka ngäng nak la ka ng’shung nak, ka ng’yii nak la ka hunbawi ah kyak ci, ani ung yumhtek ne ka phyawng ci. Ani naw changpakhui avan cu ka kaa ah tha ci.

³ Bawipa, chang cu a i ah kiasei nang naw na geing nak ang; chang cu a i ah mäih ah kyasei nang naw na ngaih nak ang.

⁴ Ani cu khokhi goh ah mäih ah kyak ci; Ani ah kho hnüüp gui cu ng’kon ciah püpüi ah mäih ah kyak ci.

⁵ O Bawipa, khomik k’pui ne, hmawg ne zu kyum law ä; Khomhtung gui cu na tawk ung mei ah khu khai gui nei.

⁶ Kho lailäp ne ng’hmum kyeek sak ne, na ga gui cu püi sak gui ä; Na m’la awn kap ne dawng sak gui ä.

⁷ A khan ah ka kyum law ne, tui thuk ungka na khui ä, na gung ä; A kho hei chang gui ah huham ungka nak phyawn ä.

⁸ Ngami cu ami cang kä pyen phung u ne, ami hleei pyen ne ng’tam ci gui nei.

⁹ O Khanpughi, kei naw ng’äi k’thai ka ning m’cu khai nei; kei naw tingtäng tum ne ng’äi ka ning m’cu khai nei.

¹⁰ Nang naw ghangpughang gui am näng nak pe ne, na changshäm David cu na gung ci.

¹¹ M’gäim’ce ciah ga gui ung na hun ne; akho hei chang gui ah huham ungka na gung ä, Ngami cu ami cang kä pyen phung u ne, ami hleei pyen ne ng’tam ci gui nei.

¹² Kami hta gui cu ami nong sangung tü m’tam ciah sing ghing ah mäih ah kya u sä. Kami hta hnumi gui cu mangtung ah mäih ah ng’bi lawk ci gui, mang im ah chuktung ah kyak ci.

¹³ Kami khei gui cu ei awk vai a hlü hlü awn be sä. Kami kho bung ung htome gui cu tämkäp phia khak ah hta u sä.

¹⁴ Kami seipat gui cu ak chün ah pung piah u ne, kä chük ka, kä maih m’tham u sä. Kami lam gui ung geinvai kyah m’lau nak kä om men sä.

¹⁵ Shin ah hriham gah ciah pakhui cu, yeikyai nak om ci nei; Khanpughi, Bawipa nak ciah chang gui cu yeikyai nak om ci nei.