SAM 143 - Cho Bible Common Language 2016

Ana M’htei Vai ah Taigü

¹ Bawipa, ka taigü na ng’yak peä! Na düng nak ung ka ng’pa nak cu na ngaih peä; Na bekhüt nak awn na m’shang ä!

² Na na changshäm cu yung ah m’kawt ung kä na cha en ä; Nang lam ah theingcim ci a u kä om ci nei.

³ Ka ga naw na yäi ne ang müi ah na m’di ci nei. Ani naw mü hmüp thawng ung na chum sei, cau pui sik ciah mäih ah ka kyak ci nei.

⁴ Cun ah kyasei kei cu ka m’lungsi ge ci; kei cu ka m’lung thüi aih ci.

⁵ Ng’pyi khän ciah hnüüp gui cu ka shüm ba ci; Nang ah bi gui avan cu ka ngaih-tüh ci, Nang ah bi gui avan cu ka ngaih-tüh ci, Nang ah hnün thawh gui avan cu ka m’lung ung ka khäm ci.

⁶ Na ma ah ka kut shäng ne ka taigü ci; kho ng’gau kho ah mäih ah ka mümcha naw tui ah gha ne ning ng’ya hlük ci.

⁷ Bawipa, Tuhbäi na m’shang ä! Ka ngaih u nak avan maih ci nei. Kä na ng’thuh en tau ä, Sihnak ah kho ah hteit ci gui ah ng’lung ah kei cu ka hteit khai kyak ci nei.

⁸ Nang ung ka zumhtek vai ah hmawk ah kho ngawi tä sei, ng’täi ciah na m’hni nak cu na m’thein ä. Ka taigü nak cu nang ah gawk ci nei; ka hteh nak vai ah lam cu na m’hnuh ä.

⁹ Bawipa, na na shungshet vai ah ka lawk ci nei; ka ga gui ah kut ung na gung ä.

¹⁰ Nang cu ka ning Khanpughi nei; na ng’yak hlü bi vai ah na m’htei ä. Kei ung ni ne, phyawn nak ah lam cu na m’shüm ä.

¹¹ “Bawipa, na shaitak ah mäih ah na gung ä; Na ni nak awn ka khüikha nak cu na hun ä!

¹² Kei na na m’hni nak awn, ka ga gui cu ngawn gui ä, Na shedam nak ci gui avan cu m’di gui ä, kei cu na changshäm ah ka kyak ci nei.