SAM 140 - Cho Bible Common Language 2016

Ana Shungvong Vai ah Taigü

¹ Bawipa, changshe gui ah kut ungka na hun ä; kiawi m’sai ciah chang gui ungka k’pang ne na gung ä.

² Ngami cu angtäi sei akshe m’zih ne bik ci gui, angtäi sei ng’cuh can ng’vongshang ci gui.

³ Ngami ah m’lei cu sih nak ah k’phyu ah mäih ah kyak ci; Ngami ah ng’thu cu m’htung k’phyu ah m’äm ah mäih ah kyak ci.

⁴ Bawipa, changshe gui ah huham ung na shungvong ä; Kei ka kyuk ng’täät vai ah bik ciah chang omshe gui ungka k’pang ne na gung ä.

⁵ Chang m’thüi gui naw kei am m’hling na ban ci gui; Ngami naw cuun cuung u ne, lam ah ng’län ung ami na pha nak vai m’hling bang ci gui.

⁶ Kei naw Bawipa am, “Nang cu ka ning Khanpughi nei.” Ka m’lau cu ng’ya ne, na m’htei ä, Bawipa!

⁷ Hlüngtai ciah ka Bawipa, khüighat ciah ka shung nak, Nang naw ng’tuk nak ung na na shungvong ci.

⁸ Bawipa, changshe gui am ami ng’yak hlü cu kä pe en gui ä; Ami ng’zih nak cu kä näng sak en gui ä.

⁹ Ka ga gui cu kä näng sak en gui ä; kei ah khan ah akshe ami bi cu ami mät ah khan ah kya ba sä.

¹⁰ Ngami cu mei k’cak naw kyak gui sä; Ngami cu khui m’gawng ung zu chah gui u sä, kä lut en law ba hlawt u sä.

¹¹ Chang akshe ah yawshe nak ci cu, kä näng en sä; m’ghäi m’ce ci gui cu leigai naw näng ne m’di gui sä.

¹² Bawipa, geinvai ci gui ah mawng shung ne, dukhaih ci gui ah lam na m’htei cu ka hmat ci nei.

¹³ Düng ciah chang gui naw akcang ah ning m’tam khai gui nei; Nang ah ma ung ngami cu ghing om khai gui nei.