SAM 139 - Cho Bible Common Language 2016

Khanpughi ah Kümbe ciah Hmuhmat nak la Tengkhen nak

¹ Bawipa, nang naw na m’nüm ne, kei cu na na hmat ci.

² Nang naw ka bi phung cu na hmat ci; Kei ah ka ngaih-tüh avan cu a shou nak ah om ne na hmat yawp ci.

³ Kei bi ka bi sang la ka ng’düm sang cu nang naw na na hmuk ci; Nang naw ka hnün thawh avan cu na hmat ci.

⁴ Kei naw ng’thu kä ka pyen pha ung, kei naw a i ka pyen vai cu nang naw na hmat pyi ci.

⁵ Nang naw kei cu akit päng ung na na k’koi ci; Na huham awn na na shungvong ci.

⁶ Na hmuhmat nak cu kei ah hmawk ah thuuk aih ci nei; kei naw kä ka hmat hlawt ci nei.

⁷ Nang ungka phyawn nak vai ah kei a hawi ka hteit hlawt khai aw? Nang ah na ma ungka a hawi ka dawng hlawt khai aw?

⁸ Kei khan kho ah ka hteh ung, nang a cu ah na om ci; sih nak kho ah ka kyum ung phi, nang a cu ah na om ci.

⁹ Kei cu hni law lam kho cawi ah zong ne, hni kyak lam asho nak pi ung ka om ung phi,

¹⁰ Nang cu a cu ah om ne, lam na na m’shüm khai, nang cu a cu ah om ne, na na m’htei khai.

¹¹ Kei cu mü hmüp ung na thup ne, akdei nakoi cicu mü m’than ah ng’lat khai ah ka thäh hning ci.

¹² Cun ung phi hmüp khui cu nang ah phäh ah kä hmüp ci, mü m’than cu hnüüp ah mäih ah dei ci. Hmüp khui la khodei cu nang ah hmawk ah atäng ah kyak ci.

¹³ Nang naw ka pumsa avan cu tüisho ne; ka nu ah puk khui ung k’bum ne na chum ci.

¹⁴ Nang cu ka ning m’tam ci, a i ah kyasei ci ung nang cu kyih aa vai na kyak ci; Nang ah na bi phung cu a hlü hlü ah cäicat vai kyak ci. Kei naw cun cu ka m’lung kyong avan awn ka hmat ci.

¹⁵ Ka guh gui cu na pyan sangung, geing na ne ka nu ah puk khui ung k’bum ne na chum ci, kei cu a cun ung adüm hta ah ka däm law yah ung, a cun ung ka om cu nang naw na hmat ci

¹⁶ Kei kä ami na hta nak pha ung nang naw na na hmuk ci. Kei ah hmawk ah m’hnüt hnüüp gui cu cun gui a i phi kä ang tün pha ung, nang naw na ca uk ung na guk pyi ah kyak ci.

¹⁷ O Khanpughi, na ngaih-tüh ka hmuh vai ah a i hlawk ah khak ciang; cun gui cu a i hlawk ah da ciang!

¹⁸ Cun cu khei vai sü ung lai gin na ta da pi khai kyak ci nei. Kei ka thawh law ung nang awn atäng ah ka om ci nei.

¹⁹ O Khanpughi, changshe gui cu na ngawn gui vai ka ng’ya hlük ci nei! Kiawi m’sau ci gui naw ami na hteh tak vai ka ng’ya hlü aih ci nei.

²⁰ Ngami naw nang ah mawng akshe ah pyen ci gui; Nang ah ming cu ngami naw shaishe awn hnung’tuk püi ci gui.

²¹ O Bawipa, ning gen ciah chang gui cu ka gen aih ci nei! Nang ning hnu ng’tuk püi ci gui cu, kei naw ka shedam nak ci nei.

²² Ngami cu gen pe bäih ne ka gen gui ci; ngami cu ka ga gui ah k’bäi gui ci.

²³ O Khanpughi, kei cu na m’nüm ne, ka m’lung cu na hmat ä. Kei cu na näät ne, ka ngaih-tüh gui cu na hmuh pe ä.

²⁴ Kei ung akshe a pi hta a om ung phi na hmuh peä, angtäi ghin nak ah lam cu na m’shüm ä!