SAM 137 - Cho Bible Common Language 2016

Israel gui M’kyuk nak Kho ah Ami Omdam nak

¹ Babilon tuinu gui pei ah ngo u neta; Zion mang gaw cu shüm ba ne kami kyap ci.

² A cun ah pei ah sing ghing gui ung sing täng gui phi kami bat ci.

³ Na pha gui ciah chang gui naw ng’äi kami m’cu vai ah pyen ci gui; Ngami naw, “Zion ah mawng ng’äi tumat m’cu vä” cine khin nak gui vai pyen ci gui.

⁴ A kho hei nu ah, keimi naw a i cha ah Bawipa am ng’äi kami m’cu thei khai aw?

⁵ Jerusalem, kei naw ka ning m’hnih ah akyak ung, Tingtäng cu kä ka tum ba hlawt khai ah kya sä!

⁶ Kei naw kä ka ning shüm ah akyak ung, a hlüngtai pi bäih ka yeikyai nak ah kä ka ning ngaih-tüh ah a kyak ung, ng’äi kä ka m’cu ba hlawt khai ah kya sä!

⁷ Bawipa, Jerusalem cu tuh ne ami khäm yah ung Edomit gui ah bi cu shüm ba ä. “M’dek ah khüt khai ah tu ne m’cin vai nei!” ami cicu shüm ba gui ä.

⁸ Babilon, nang cu na di khai nei. Keimi ah khan ah nang naw na bi ah hmawk ah ning thung ba ne bik ciah chang ah khan ah yeikyai nak om sä,

⁹ na hta naw hmaw hta gui la ne lungsheng mawk sak ciah chang ah khan ah yeikyai nak om sä.