SAM 135 - Cho Bible Common Language 2016

M’Tam nak Ng’äi

¹ Bawipa cu m’tam vä! Bawipa ah changshäm gui ang ming cu m’tam vä,

² Bawipa ah a im, mi Khanpughi ah Pum im kyong ah ng’düi ci gui naw.

³ Bawipa cu m’tam vä, ani cu nik ci nei; Aming m’tam ne ng’äi vä, ani cu bä ci nei.

⁴ Ani naw amät ah hmawk ah Jakob cu ghü ne, Israel chang gui ci kaa na gui ci.

⁵ Mi Bawipa cu dämduh ciah kei naw ka hmat ci, khanpughi gui avan ah dämduh pi ci.

⁶ Khankho la khomdek ung, tuinu la tuinu ah ka ung Ani naw ang yak hlü phung cu bik ci.

⁷ Ani naw khomdek ah kem ah ka khomei gui ci kai law sak ci; kho phi lailäp ne ng’hmum kyeek sak ci, a im khei ungka khokhi phi luh law sak ci.

⁸ Egypt kho ah chang gui ah hta htük avan la, vuhchah gui ah hta htük gui avan cu ani naw ngawn yawp ci.

⁹ A cun ah kho ah ghangpughang la abawi gui m’kyuk nak vai ah cäi aih vai la cäicat gui vai cu ani naw m’dang ci.

¹⁰ Ani naw changpakhui gui akda m’di ne, huham mah ciah ghangpughang gui phi ngawn gui ci:

¹¹ Cun gui cu Shihon, Amorit ghangpughang: Ok, Bashan ghangpughang; Kanaan kho ah ghangpughang gui ami van ah kyak ci.

¹² Ani naw ami kho gui cu ak chang gui am ap gui ne, Israel gui am pe gui ci.

¹³ Bawipa, nang cu angtäi sei Khanpughi ah na kyak mawng ng’shäu khai nei; hta ng’shon avan naw ning shüm khai nei.

¹⁴ Bawipa naw a chang gui cu shungshet gui ne; changshäm gui cu k’dük gui khai.

¹⁵ Chang pakhui gui ah khanpughi gui cu ghui la ngui awn pyan ah kyak ci; cun gui cu chang ah kut awn sheh ah kyak ci.

¹⁶ Cun gui cu ami m’gawng om ci, kä ng’thu thei ci gui; ami mik om ci kä hmu thei ci gui.

¹⁷ Ami hnga om ci kä ng’ya thei ci gui; Ngami cu kä ng’ghi ng’ghawk ci gui.

¹⁸ Cun gui pyang ne cun gui yum ciah chang avan cu, ami mät ah pyan ah a gup ah mäih ah kya u sä!

¹⁹ Bawipa cu m’tam vä, Israel chang gui; Khanpughi ah taigü gui ani cu m’tam vä!

²⁰ Bawipa cu m’tam vä, Levit chang gui; Ani khawihnah ciah chang van naw ani cu m’tam vä!

²¹ Zion m’htung la Jerusalem mang gaw a im ung, Bawipa cu m’tam vä. Haleluyah. Bawipa cu m’tam vä!