SAM 132 - Cho Bible Common Language 2016

Pum Im ung M’taam khah nak

¹ Bawipa, David la a bui awt ah yaica nak gui cu kä m’hnih en ä.

² Bawipa, ani ah a shaitak la Jakob ah m’gäi ciah Khanpughi, nang ung ang taam cu shüm ba ä:

³ “Kei cu im ah kä ka htei ba khai, ih phak ung kä ka ng’zän khai,

⁴ Kei cu kä ka ng’düm khai, kä ka ip khai,

⁵ Bawipa ah hmawk ah hmun, Jakob ah m’gäi ciah Khanpughi ah hmawk ah im, kä ka hmuh pha ah chuih cun ah ka om khai.”

⁶ Bethlehem ah Thukhän m’küm ah mawng mi ng’ya pyi ci, Jearim kho hmun ung mi hmu pyi ci.

⁷ Mikmi naw, “Bawipa ah im ah mi hteit khai nei; Amang kiang pei ah mi khawihnah khai nei” mi cik ci.

⁸ Bawipa, Thukhän m’küm awn Pum Im kyong ah lut law ä, Na huham m’dang ne shin ung angtäi sei om ä.

⁹ Na taigüpa gui naw angtäi sei düng nak cu bi u sä; Na chang gui cu yei ne m’lau u sä!

¹⁰ Na changshäm David ung shaitaak na bik ci; Na ghü ah ghangpughang cu kä hnu ng’tuk en püi ä, Bawipa.

¹¹ Nang naw David ung bä ciah shaitak na bik ci cun ah shaitak cu nang naw kä na la ba khai: “Kei naw na hta gui ungka tumat cu ghangpughang ah ka hmoh khai, Nang ah kawn ah ani naw uk khai.

¹² Na hta gui cu ka thukhän la ka pek gui ah thumkhän ung ami düng ah a kyak ung, ami hta gui cun phi, nang ah khui m’düng u ne, kho ng’län ung ghangpughang ah kyak khai gui.”

¹³ Bawipa naw Zion manggaw cu ghü pyi ci; Ani naw cun cu a im ah pyang hlük ci:

¹⁴ “Shin cu kei naw ka om nak lä vai ah kyak ci; Shin cu kei naw ka uk nak hlü ah kyak ci.

¹⁵ Kei naw Zion mang gaw ah ang yak hlü cu ak bä ah ka küm be sak khai; kei naw a dukhaih nak cu ei awk awn ka ng’büh sak khai.

¹⁶ Kei naw a taigüpa gui cu ami bi nak phung ung hriham ka pe gui khai, a chang gui naw yei ne m’lau ne ng’äi m’cu khai gui.

¹⁷ Shin ung David ah hta ng’shon ung ka, tumat cu ghangpughang mang ah ka k’hmoh khai; ka ghü ah ghangpughang ah uk nak cu ka pyan pek khai.

¹⁸ Ani ah ga gui cu thüi ng’aa nak awn ka küm khai, Ani ah uk nak kho cu ng’bühmang ne, bä m’cam khai.”