SAM 129 - Cho Bible Common Language 2016

Israel gui ah Ga gui Hnu ng’tuk Püi ne Taigü

¹ Israel gui, nami ga gui naw nami hmaw yah ng tün ne a i hlawk ah ami ning dukdeiu nak gui cu pyen vä,

² “Kei ka hmaw sangung tün ne, ka ga gui naw akshe ah na dukdeiu nak ci gui, cun ung phi ngami naw kä na näng hlawt ci gui.

³ Ngami naw ka hnu k’pang ung thuuk khai ah na k’phleim u ne, lai thawh ah mäih ah bik ci gui.

⁴ Cun ung phi, Bawipa, düng ciah Bawi naw, Khleihtein ungka na m’hlawt ci.”

⁵ Zion mang gaw thüi nak ciah chang phung cu, tuh ne k’täm gui u sä.

⁶ Ngami cu im khan ah pyou ne kä adäm pha ung chawng ciah m’ghaw ah mäih ah kya u sä;

⁷ Cun gui cu a u naw kä m’sep khai, a u naw pawk ne kä hteh püi khai.

⁸ Ani sun pah ciah chang naw phi, “Bawipa naw hriham ning pe sä! Bawipa ah ming ung hriham kami ning pek ci nei” kä ci phung khai gui.