SAM 12 - Cho Bible Common Language 2016

Ana M’htei vai ah Taigü nak

¹ Na m’htei gui ä, Bawipa! Changni maih ne; Chang man kä om ba ci nei.

² Chang gui cu tumat naw tumat m’hleei sei; Ami thu a hei, ami ngaih a hei ah kyak ci gui nei.

³ O Bawipa! Thuvi ciah m’lei cu dim sak ä. Khäh ghah ciah m’gawng cu bing sak ä,

⁴ “Mi ng’thu awn mi m’hni cu mi gah ci. Mi ng’yak hlü cu mi pyen ci, a u naw kä na ng’düm sak gui hlawt ci” cik ci gui.

⁵ Bawipa naw, “Cun ung phi tuhbäi kei ka lawk khai,” A i ah kyasei ci ung, dukhaih ci gui ami shedam nak, dukdeiu ci gui ah m’lau ng’pyan ah hmawk ah kyak ci. Ngami am ami ng’yak hlü ah m’lung üp nak cu ka pe gui khai.

⁶ Bawipa ah a shaitak cu a ng’ciim ah kyak ci; Cun cu mei hungling ung chih vei shong ne ami m’cin ah ngui ng’siing ah mäih ah kyak ci.

⁷ O Bawipa, nang naw phyawn vai ah na shungvong gui ä, Cun ah chang gui ung na shung gui ä.

⁸ Changshe gui cu avan ung om ci gui nei, Ak chang sing naw akshe cu yei nak ci gui nei.