SAM 119 - Cho Bible Common Language 2016

Bawipa ah Thukhän

¹ Yeikyai nak om ci gui cu a ghing nak ung cheishoh nak kä om sei, Bawipa ah thukhän ung ghing ci gui ah kyak ci.

² Yeikyai nak om ci gui cu a thumkhän läk ne, am lung kyong avan awn ani yum ci gui ah kyak ci.

³ Ngami cu cheishoh nak kä bi phung ci gui; Bawipa ah lam ung hteit ci gui.

⁴ Bawipa, nang naw na thukhän cu na na pe gui ci, bekhüt ne kami läk vai ah na nam thein gui ci.

⁵ Kei cu bekhüt ne nam cäi m’ä nak ka kutshum thei vai ah ka ngaih u aih ci nei!

⁶ Kei naw na thumkhän avan ka läk hning ah akyak ung, kei ung lü ng’aa nak kä om khai nei.

⁷ Ng’düng ciah na ng’thumcha nak cu, kei naw ng’thei neta, ng’ciim ciah m’lung awn ka ning m’taam khai nei.

⁸ Na thukhän cu ka läk khai nei; kä na nawng shüt en ä!

Bawipa ah Thukän läk nak

⁹ Chang nong naw a ghin nak cu a i cha ah theingcim sak khai ang? ci ung, nang ah thumkhän läk nak awn kyak ci.

¹⁰ Ka m’lung kyong van awn na khut bi vai ah ka tha nak ci nei; Na thumkhän ka läk nak hning vai ah na kutshum ä.

¹¹ Na thukhän cu ka m’lung ung ka chum ci nei, Ning hnu ng’tuk püi ne katnak kä ka bik khai nei.

¹² O Bawipa, ka ning m’tam ci nei; Na lam gui cu na m’thei ä.

¹³ Nang naw na na pek ah na thukhän gui cu ang shawng ah ka pyen ba khai nei.

¹⁴ Bä m’cam vai ah mä nang ah thumkhän gui läk vai cu kei naw ka yum hni pi ci nei.

¹⁵ Nang ah m’shüm thei nak gui cu kei naw ka ng’thei ci; na na m’thei gui cu kei naw ka m’nüm ci.

¹⁶ Kei naw na thukhän ung yei nak ka gah ci; Na thumkhän gui cu kä ka m’hnih khai.

Bawipa ah Thukhän ung Yeikyai nak

¹⁷ Na na changshäm ung ni nak na pe ä, cun ung kei naw ghin na ne, na m’theithang cu ka läk khai nei.

¹⁸ Ka mik na m’dei sak ä, cun ung na thukhän ung cäicat vai düng nak gui cu kei naw ka hmuk khai nei.

¹⁹ Kei shin ah khomdek khan ung ashäng hta ka om ci; Na thumkhän cu kei am kä na thuh en pe ä.

²⁰ Ka ngäng nak ka m’lung na pyi ci nei, Na m’khoi m’cha nak cu ak phlüt ah ka hmat hlük ci nei.

²¹ Nang naw chang ah ng’shei cicu k’she na ne, na thumkhän kä läk cicu na plah tam ci.

²² Na thukhän cu ka k’pang ci kyasei, k’shedam nak la päipih nak ung nak phyawn ä.

²³ Uk ciah bawi gui naw na yawshe nak ne na hnu ng’tuk püi ci gui, cun ung phi na m’theithang bäng ka ng’thei khai.

²⁴ Nang ah m’shüm thein nak gui naw yeikyai nak na pek ci; Ngami naw na tängpang püi ci gui.

Bawipa ah Thukhän Läk vai ah K’bäi nak

²⁵ Kei cu m’vut khui ung di ne ka ng’zän ci nei; na shaitak ah mäih ah na m’tho vä.

²⁶ Ka bi phung avan ng’yu ne ka ng’pa ci, nang naw na na m’shang ci; na lam gui cu na m’thei ä.

²⁷ Na thukhän hmuhmat nak vai ah na m’htei ä, cäicat vai ah na m’theingthang gui cu ka ngaih nak khai nei.

²⁸ Kei cu thüisei nak naw na m’khüt ci nei; Na shaitak ah mäih ah thagui na k’be ä.

²⁹ Lam she ung hteh nak ungka na m’hlat ba ne, na ni nak ung na thukhän cu na m’thei ä.

³⁰ Ng’thu ngaih nak vai cu ka ghü pyi ci nei; na m’khoi m’cha nak cu ka läk ci nei.

³¹ Bawipa, Na m’shüm thein nak cu ka läk ci nei; kä na lü ng’aa en sak ä.

³² Na thumkhän cu kei naw akcang ah ka läk khai nei, A i ah kyasei ci ung nang naw hmuh hmat nak pi cu na na pek khai.

Hmuhmat nak vai ah Taigü nak

³³ Bawipa, na thukhän ah a mawng cu na m’thei ä, kei naw angtäi sei ka läk khai nei.

³⁴ Na thukhän cu kei am na m’thein ä, kei naw ka läk khai nei. Ka m’lung avan awn ka shüm khai nei.

³⁵ Na thumkhän ngaih nak vai ah na shum ä, a cun ung yeikyai nak ka hmuk ci nei.

³⁶ Ng’bühmang nak ah ta, na ng’thukhän läk nak hlü cu na pe ä.

³⁷ A kholä maih ah kyak ci ma nak ungka, na k’pang ne; Na shaitak ah mäih ah na ni kyom püi ä.

³⁸ Na changshäm kei ung — na shaitak cu m’khän ä, cun cu ning ngai ci gui am na shaitak ah kyak ci.

³⁹ Kei naw ka kyih ah shedam nak ung na hun ä; Na m’khoi m’cha nak cu cäi aih vai kyak ci nei!

⁴⁰ Na thumkhän gui cu ka läk hlük ci nei; Ghin nak akthai na pe ä, nang cu na ng’düng ci nei.

Bawipa ah Thukhän ung Yumhtek nak

⁴¹ Bawipa, a i hlaw ah na na m’hni cu na m’dang ä, Na shaitak ah mäih ah na hun ä.

⁴² Cun ung kei naw nak shedam nak cicu ka m’shang hlawt khai, a i ah kyasei ci ung nang ah thu ung kei ka zumhtek ci.

⁴³ Ak phlüt ah ng’düng ciah ng’thu thei vai ah na ng’thu sak ä, a i ah sei ci ung ka ngaih u nak cu na ng’thumcha nak ung om ci.

⁴⁴ Kei naw angtäi sei na thukän cu ka läk khai, ngaw yä kho ng’län ung.

⁴⁵ Kei cu akbe ah ng’päize ne ka om khai, a i ah kyasei ci ung kei naw na m’theithang gui cu ka läk vai ah ka tha nak ci.

⁴⁶ Na thumkhän gui cu kei naw ghangpughang gui ah ma ah ka ng’shäu khai, kei cu kä ka lü ng’aa khai.

⁴⁷ Na thumkhän läk nak ung lünlawi nak cu ka hmuk ci, a i ah kyasei ci ung cun gui cu kei naw ka m’hni ci.

⁴⁸ Na thumkhän gui cu kei naw m’kümto ne ka m’hni ci; Na m’shümthein nak ung ka ngaih gep khai nei.

Bawipa ah Thukhän ung Ngaih gep nak

⁴⁹ Na changshäm, kei ung na shaitak cu shüm ba ä; a cun naw ngaih u nak na pek ci nei.

⁵⁰ Kei ka geinvai yah ung phi, ng’shungvong nak om ci nei, a i ah kyasei ci ung na shaitak naw ghin nak na pek ci.

⁵¹ Chang ah ng’shei ci gui naw angtäi sei, na päipih ci gui, cun ung phi na thukhän cu kä ka hteh tak ci.

⁵² Caupui na m’khoi cha nak cu kei naw ka shüm ci, a cun gui naw na shungvong ci nei, O Bawipa.

⁵³ Changshe gui naw n a thukhän ami gäi ka hmuh ung, kei cu ka m’lungshek ci nei.

⁵⁴ M’dek khan ung ashäng ka ghing sang ung Na thumkhän ah mawng ng’äi ka pyang ci.

⁵⁵ Mü ah phi Bawipa, ka ning shüm ci, Na thukhän ah mawng cu ka ngaih — tüh ci.

⁵⁶ Na thumkhän läk nak ung kei naw yeikyai nak ka hmuk ci nei.

Bawipa ah Thukhän ung Ng’ap nak

⁵⁷ O Bawipa, nang cu kei ah ng’yak hlü avan ah na kyak ci; Na thukhän läk vai ah shai ka tak ci nei.

⁵⁸ Na shaitak ah mäih ah na na chimgein vai ah ka m’lung kyong avan awn ka ning yoi ci nei!

⁵⁹ Ka mät ah om ih gui cu ngaih-tüh ba neta, Na m’shüm thein nak gui cu läk vai ah shai ka tak ci nei.

⁶⁰ Kä sho shü ne ang ghit ah na thumkhän läk vai ah ka bik ci nei.

⁶¹ Changshe gui naw kei ah hmawk ah cuun cung u sei phi, na thukhän cu kä ka m’hnih ci nei.

⁶² Ng’düng ciah na ng’thumcha ah hmawk ah ning m’taam vai ah kei cu kho cawih ding ah ka tho lawk ci nei.

⁶³ Kei cu na khuut bik ci avan la na thukhän läk ci avan ah teihpüi ah ka kyak ci.

⁶⁴ Bawipa, khomdek cu ng’täi ciah na m’hni nak awn be ci nei; na thumkhän gui cu na m’theithang ä.

Bawipa ah Thukhän ah Phu ma

⁶⁵ Bawipa, nang naw na shaitak cu na k’pang ci, Na changshäm, kei ah khan ah na ni ci.

⁶⁶ Na thumkhän ung ka zumhtek ci kyasei, cüivai nak la hmuhmat nak cu na yuk pe ä.

⁶⁷ Nang naw kä na na m’kyuk pha ung kei cu ka cheishoh lä ci, cun ung phi tuhbäi na thu ka ngai ci nei.

⁶⁸ A i hlawk ah na nik ci, a i hlawk ah na bä ci ang! Na thumkhän cu na m’thei ä.

⁶⁹ Chang ah ng’shei ci gui naw kei ah mawng cu hleei ne pyen ci gui, cun ung phi ka m’lung kyong avan awn na m’shüm thein nak cu ka läk ci nei.

⁷⁰ Shin ah chang gui ung hmuhmat nak kä om ci, cun ung phi na thukhän ung lünlawi nak ka hmuk ci.

⁷¹ Na na m’kyuk nak cu bä ci nei, a i ah kyasei ci ung, a cun naw na thumkhän cu na ng’thei sak ci.

⁷² Thukhän na pek cu kei ah hmawk ah khomdek khan ung ngui avan ah bä pi ci nei.

Bawipa ah Thukhän ah Taga nak

⁷³ Nang naw na tüisho ne, phyawn vai ah na na shung ci; Hmuhmat nak na peä, cun ung na thukhän cu ka ng’thei thei khai.

⁷⁴ Nang ning m’tamkhah ci gui phung cu kei ami na hmuh ung yei khai na shaitak ung ka zumhtek ci.

⁷⁵ Bawipa, na m’khoi cha nak ng’düng ciah ka hmat ci nei, Nang cu na bekhüt ci kya ne kei cu na na m’kyuk ci nei.

⁷⁶ Na changshäm, kei ung na shaitak ah mäih ah ng’täi ciah na m’hni nak naw na shungvong sä.

⁷⁷ Kei cu na m’gein ä, cun ung ka ghing khai, a i ah kyasei ci ung na thukhän ung lünlawi nak ka gah ci.

⁷⁸ Chang ah ng’shei ci gui cu kei ami na plahtam ah phäh ah thüi ng’a u sä; kei ka mät läi cu, na m’shümthein nak, ka ngaih nak khai nei.

⁷⁹ Nang ning m’tamkhah ci gui na thumkhän hmat ci gui avan cu, kei ah law u sä.

⁸⁰ Na thumkhän küm khai ah ka läk nak vai ah thu ng’a ne di nak ung na pyang m’tham ä.

Phyawn Vai ah Taigü nak

⁸¹ Kei kä ka näng ba ci, Bawipa, na na hun vai ka ning ngäng ci nei; Na thu ung ka zumhtek nak ka ap ci nei.

⁸² Na shaitak ka dan nak ah ka mik cüm lawk ci nei, cun sangung, “Kho i khäta na na m’htei khai ang?” cine ka ning shik ci.

⁸³ Meikhu thuk ciah savun um ah mäih ah, kei cu a i ah kä ka mawng ci; cun ung phi na thumkhän cu kä ka m’hnih ci.

⁸⁴ A i güt kei naw ka ning gin vai ang? Kei na dukdeiu nak ci gui cu khaw a i khäta na m’kyuk gui khai ang?

⁸⁵ Chang ah ng’shei ne, na thukhän kä läk ciah chang gui naw kei ah kyak nak vai ah khui shawk ci gui nei.

⁸⁶ Na thumkhän avan cu zumhtek nak ah kyak ci nei; chang gui naw hleei ne na dukdeiu nak ci gui nei, na m’htei ä!

⁸⁷ Ngami naw na näng ne na ngawn law vai ci gui, cun ung phi na thukhän cu kei naw kä ka nawng phung ci nei.

⁸⁸ Ng’täi ciah na m’hni nak cu kei ah khan ah bä ci nei, Cun ah kyasei kei naw na thukhän gui cu ka läk khai nei.

Bawipa ah Thukhän ung Yumnak

⁸⁹ O Bawipa, na thu cu kho ng’län ung om khai nei, cun cu khankho ah angtäi ah om ci nei.

⁹⁰ Na bekhüt nak cu ng’shon päng ung khäng ci nei; khomdek cu a hmun ung nak süm ci, cun cu om lä ci nei.

⁹¹ Ak ghing om avan cu tuhngawi güt om ci gui, cun cu na thumkhän ah hmawk ah kyak ci, cun gui ami van cu na shäm ah ami kyak ah hmawk ah kyak ci.

⁹² Na thukhän cu ka yei kyai nak ah a phung ah kä a kyak vai sü ung, kei cu ka geinvai nak gui awn ka sik khai sü te nei.

⁹³ Kei naw na m’shüm thein nak gui cu kä ka nawng phung khai, A i ah kyasei ci ung a cun awn nang naw kei cu na na ghin sak ci.

⁹⁴ Kei cu na na chang nei — na hun ä! Kei naw na thumkhän cu läk vai ah ka tha nak ci nei.

⁹⁵ Changshe gui naw, na ngawn khai gui ah na ngäng ci gui nei, cun ung phi kei naw na thukhän cu ka ngaih nak khai nei.

⁹⁶ Apäng avan akhin bääi bäng bäng cu kei naw ka hmat ci nei; cun ung phi nang ah thumkhän cu küm be ci.

Bawipa ah Thukhän M’hni nak

⁹⁷ Na thukhän cu a i hlawk ah ka m’hni ci aw! A hnüüp pum ung ka ngaih-tüh ci nei.

⁹⁸ Na thumkhän cu angtäi sei kei awn om ci, cun naw ka ga gui ah ta na cüivai sak pi ci.

⁹⁹ Na m’shümthein gui avan ka ngaih nak ah hmawk ah, kei cu ka saya gui van ah ta, ka hmuhmat law pi ci.

¹⁰⁰ Na thumkhän gui ka läk ah hmawk ah ghi ng’vai ci gui ah bä pi sei ka lu ng’lang ci.

¹⁰¹ Na ng’thu ka läk hlü ah hmawk ah akshe phung avan cu ka hlawi ci nei.

¹⁰² Nang na mät cu ka ning saya ah kiasei, na m’shüm thein gui cu kä ka nawng phung ci nei.

¹⁰³ Na m’shüm thein nak gui cu tui hlim aih ci nei khoi tui ah ta tui pi ci gui nei.

¹⁰⁴ Kei cu thukhän awn ka cüivai lawk ci kya ne, akshe bilawh phung cu ka thüi nak ci nei.

Bawipa ah Thukhän ung Akdei

¹⁰⁵ Na thu cu na shü ciah mei im ah kya ne, ka lam ung akdei ah kyak ci.

¹⁰⁶ Kei naw tuhbäi na m’shümthei läk vai ah akcang ah ka shaitak cu ka k’pang khai nei.

¹⁰⁷ Bawipa, ka geinvai nak gui cu akcang ah tä aih ci nei; Na shaitak ah mäih ah na ghin sak ä.

¹⁰⁸ O Bawipa, m’hlüngtai ne ka taigü cu na dou pe ä, Na thukhän cu na m’theithang ä.

¹⁰⁹ Kei cu angtäi sei ka ghin nak m’hlüng ge vai ah ka om ci nei; Na thukhän cu kä ka m’hnih phung ci nei.

¹¹⁰ Changshe gui naw kei ah hmawk ah m’hling bang ci gui nei, cun ung phi kei cu na thumkhän kä läk ah kä ka om ci nei.

¹¹¹ Na thumkhän gui cu ng’täi ciah ka khawh cham ah kyak ci; cun gui cu ka m’lung kyong ah yei nak ah kyak ci.

¹¹² Kä ka sih pha ah chuih na thukhän ka läk khai ah, ka k’bäi pyi ci nei.

Bawipa ah Thukhän ung Phyawn nak

¹¹³ Kei naw nang ung kä bekhüt ci gui cu ka gen gui ci, cun ung phi na thukhän cu ka m’hni ci nei.

¹¹⁴ Nang cu ka ng’yii nak la ka shung nak ah na kyak ci; na shaitak ung ka ngaih u om ci.

¹¹⁵ Shekak ciah chang gui a hei ah hteit vä. Kei cu ka Khanpughi ah thumkhän ka läk khai nei.

¹¹⁶ Na shaitak ah mäih ah thagui na k’be ä, kei cu ka ghing khai nei; ka ngaih u nak ung kä na thüisei en sak ä.

¹¹⁷ Na k’pang ä, ka phyawng khai nei, kei naw angtäi ah na thumkhän cu ka ma nak khai nei.

¹¹⁸ Na thukhän kä läk ci phung cu nang naw na hnu ng’tuk püi ci; ngami ah thuvi nak cu a kholä ah kyak ci nei.

¹¹⁹ Nang naw changshe avan cu ng’awt ah mäih ah na ngai ci, cun ah kyasei kei naw na m’shüm thein nak cu ka m’hni ci.

¹²⁰ Nang ah hmawk ah kei ka kyik ci, na m’khoi m’cha nak ah hmawk ah kyih nak awn ka be ci.

Bawipa ah Thukhän Läk nak

¹²¹ Ng’düng nak la ni nak cu ka bi pyi ci nei; ga gui ah kut ung kä na nawng en ä!

¹²² Na changshäm na m’htei vai ah shai yuk ta law ä; chang omshe gui naw kei cu kä na yawshe en na u sä!

¹²³ Na hun m’htei nak la phyawn nak vai ah na shaitak ka dan nak ah kamik cüm lawk ci nei.

¹²⁴ Ng’täi ciah na m’hni nak awn kei ung bi bi ne, Na thumkhän cu na m’thei ä.

¹²⁵ Kei cu na na changshäm nei; hmuhmat nak na yuk pe law ä, cun ung kei naw na m’theithang cu ka hmat khai.

¹²⁶ Bawipa, na hnün thawh nak vai akhin gawk lawk cine, A i ah kyasei ci ung chang gui naw na thukhän kä läk ci gui nei.

¹²⁷ Kei naw na thumkhän cu ghui ah ta ka m’hni pi ci, Ghui k’ni ah ta ka m’hni pi ci.

¹²⁸ Cun ah kyasei, kei naw na m’shüm thein avan cu ka läk ci; akshe lam avan cu ka thüi nak ci.

Bawipa ah Thukhän Läk nak hlü

¹²⁹ Na m’theithang gui cu cäicat vai kyak ci; kei naw ka m’lung avan awn ka läk ci.

¹³⁰ Khukhai ne na m’theithang nak naw akdei cu pek ci, chang k’ang gui cu cüivai sak gui ci.

¹³¹ Na thumkhän ka ng’yak nak hlü aih awn ng’hät ne ka shai ka m’an ci nei.

¹³² Na m’hni ah chang gui ah khan ah na bi ah mäih ah kei lam ah ng’hlat law ne na m’gein ä.

¹³³ Na shaitak ah mäih ah zu ng’kiak nak ung ka, na k’pang ä; akshe gui naw kä na näng en u sä.

¹³⁴ Na shedam nak ci gui ungka na hun ä, cun ung na thumkhän cu kei naw ka läk thei khai.

¹³⁵ Na ma ah hriham na pe ne, na thukhän cu na m’thei ä.

¹³⁶ Chang gui naw na thukhän kä ami läk ah hmawk ah tuinu ah mäih ah ka ng’phli li ci nei.

Bawipa ah Thukhän ah Taga nak

¹³⁷ Bawipa, nang cu na düng ci, na thukhän gui cu taga ci.

¹³⁸ Nang ah peit ah k’bäi nak gui cu akbä ah ni ne düng ci.

¹³⁹ Ka ga gui naw na thumkhän cu a i ah kä ngai u khäta, ka m’lungshe nak naw mei ah mäih ah na ui ci nei.

¹⁴⁰ Na shaitak cu a i hlawk ah ng’htei ci! Kei naw a i hlawk ah ka m’hni ci aw!

¹⁴¹ Kei cu kä changtuung, ami na päipih, cun ung phi nang ah m’theithang cu kä ka nawng ci.

¹⁴² Na düng nak cu kä ng’pyi hlawt khai, na thukhän cu ak phlüt ah cang khai.

¹⁴³ Kei cu geinvai khüikha nak awn ka be ung phi, Na thumkhän naw na yei kiai sak ci.

¹⁴⁴ Na m’shüm thein nak cu angtäi sei taga ci, hmuhmat nak cu na yuk pe ä, kei ka ghing khai nei.

Phyawn nak Vai ah Taigü nak

¹⁴⁵ Ka m’lung kyong avan awn ka ning khü ci nei; Bawipa, na m’shang ä, Na thumkhän cu kei naw ka läk khai nei!

¹⁴⁶ Ka ning khü ci nei; Na hun ä, na thukhän cu ka k’pang khai nei.

¹⁴⁷ Hni kä a pyi law pha ung na na m’htei vai ah ka ning khü ci nei; Na shaitak ung ka ngaih u nak cu ka tha ci nei.

¹⁴⁸ Khomü pum ung ka ng’zän nak ung ng’shüm ne, Na m’shüm thein nak cu ka ngaih nak ci nei.

¹⁴⁹ Na m’hni nak cu ng’täi ci kyasei, O Bawipa, na ng’ya ä; Na m’gein nak cu na m’dang ne ka ghing nak cu na ngäng ä!

¹⁵⁰ Ak she ah na dukdeiu nak ci gui cu ng’et law pi ci gui nei, Ngami cu na thukhän kä k’pang ciah chang gui ah kyak ci.

¹⁵¹ Cun ung phi Bawipa, nang cu kei awn na ng’et ci, Na thumkhän gui avan cu khäng ci.

¹⁵² Cau ä ge ung nang ah m’shüm thein nak cu ka ng’thei ci; Nang naw kä maih hlawt khai ah na pyan ah kyak ci.

Ana M’htei Vai ah Ng’paa nak

¹⁵³ Ka geinvai nak cu teng ne, na hun ä, A i ah kyasei ci ung, kei naw na thukhän cu kä ka nawng ci.

¹⁵⁴ Ka mawngma cu na shung pe ne na m’hlawt ä, Na shaitak ah mäih ah na hun ä.

¹⁵⁵ Changshe gui cu na thukhän kä ami läk ah phäh ah, hun nak kä gah khai gui.

¹⁵⁶ Cun ung phi Bawipa, na m’hteihtang nak cu dämduh ci nei; Na m’gein nak na m’hnuh ne, na hun ä!

¹⁵⁷ Kei ung ka ga la na shedam nak cicu da ai ci nei, cun ung phi na thukhän läk vai ah kä ka zu ng’kia phung ci nei.

¹⁵⁸ Kä bekhüt ci gui cu ka teng ung, ka m’lung cu m’neh awn be ci, a i kyasei ci ung ngami naw na thumkhän cu kä k’pang ci gui.

¹⁵⁹ Bawipa, na shümthein nak a i hlawk ah ka m’hni cu teng ä, Na m’hni nak cu kä thawng phung ci, cun ah kyasei, kei cu na hun ä!

¹⁶⁰ Na thumkhän ah m’lung cu k’cang nak ah kyak ci, ng’düng ciah na ng’thumcha nak avan cu ng’täi ci.

Bawipa ah Thukhän Ngaih Khen nak

¹⁶¹ Huham ah ciah chang gui naw kä düng ciah na hnim ci gui, cun ung phi na thukhän cu ka kyih aa ci.

¹⁶² Na shaitak ah hmawk ah ka yei aih ci, cun cu mangnak vai khawh ng’peeih hmuk ciah yei ah mäih ah kyak ci.

¹⁶³ Hleeihlak avan cu kei naw thüi na ne ka shemshai ci, cun ung phi na thukhän cu ka m’hni ci.

¹⁶⁴ Düng ciah na m’khoi cha ah hmawk ah ak hnüüp tä chi vei ci ka ning m’hlüngtai ci.

¹⁶⁵ Na thukhän m’hni ci gui ung kümbe ciah ngaih gep nak om ci, Ngami yu ng’kyak sak gui khai a i phi kä om ci.

¹⁶⁶ Bawipa, na na hun vai ah ka ning ging ci nei, Na thumkhän ah mäih ah ka bik ci nei.

¹⁶⁷ Na m’theithang gui cu ka läk ci; ka m’lung kyong avan awn ka m’hni ci.

¹⁶⁸ Na thumkhän la na m’shümthein nak gui cu kei naw ka läk ci; ka bi phung cu nang naw na hmuk ci.

Ana M’htei Vai ah Taigü

¹⁶⁹ Bawipa, na na m’htei vai ah ka m’lau nak cu nang ah gawk sä! Na shaitak ah mäih ah hmuhmat nak cu na pe ä.

¹⁷⁰ Ka taigü na ngaih pe ä, na shaitak ah mäih ah na hun ä.

¹⁷¹ Kei naw angtäi sei ka ning m’tam khai, nang naw na thukhän gui cu na na m’thei ci.

¹⁷² Kei naw na thukhän ah mawng ng’äi ka m’cu khai, a i ah kyasei ci ung thumkhän gui cu taga ci.

¹⁷³ Ang täi sei na na m’htei ge khai ah om ä, a i ah kyasei ci ung kei naw na thumkhän cu ka läk ci.

¹⁷⁴ O Bawipa, na hun m’htei nak cu a i güt ka gin vai ang? Na thukhän ung yeikyai nak ka hmuk ci nei.

¹⁷⁵ Ghin nak na pe ä, cun ung kei naw ka ning m’tam khai, Na m’shümthein nak gui naw kei cu na m’htei sä.

¹⁷⁶ Maih ciah htome ah mäih ah ka ng’vaak shüi ci nei; Na changshäm cu law ne na teng law ä, Kei naw na thukhän gui cu kä ka nawng düt ci nei.