SAM 118 - Cho Bible Common Language 2016

Nängnak Vai ah Yei ne Taigü nak

¹ Bawipa cu m’hlüngtai vä, ani cu nik ci, ani ah m’hni nak cu ng’täi ci nei.

² Israel chang gui naw pyen u sä, “Ani ah m’hni nak cu ng’täi ci nei.”

³ Khanpughi ah taigü gui naw pyen u sä, “Ani ah m’hni nak cu ng’täi ci nei.”

⁴ Ani khawihnah ciah chang phung naw pyen sä, “Ani ah m’hni nak cu ng’täi ci nei.”

⁵ Ka khüikha sangung Bawipa cu ka khü ci; Ani naw na m’shang ne, nam hlawt ci.

⁶ Bawipa cu kei awn om ci, kei cu kä ka kyik khai; kei ah khan ah a u naw a i bi hlawt khai ang?

⁷ Bawipa naw kei cu na m’htei ci, ka ga gui ami di cu kei naw ka hmuk khai.

⁸ Bawipa ung ng’ap cu chang ngaih u ah ta bä pi ci.

⁹ Bawipa ung ng’ap cu chang angvaihta gui ngaih u ah ta ni pi ci.

¹⁰ Ga gui akda naw nak koi ci gui. Cun ung phi Bawipa ah huham awn kei naw ka m’di gui ci!

¹¹ Ngami naw ang kit päng ung na mah ci gui; cun ung phi Bawipa ah huham awn kei naw ka m’di gui ci!

¹² Ngami naw khoi gui ah mäih ah na vum ci gui, cun ung phi ng’hling mei ah uih ah mäih ah pyäm ci gui; Bawipa ah huham awn kei naw ka m’di gui ci.

¹³ Kei cu a ghuih ah na buh tawn ne, na m’di u sei phi, Bawipa naw na m’htei ci.

¹⁴ Bawipa naw na huham mah sak ne, na k’thamah sak ci, Ani naw na hun ci.

¹⁵ Khanpughi ah chang gui a phung ah kyong ah, Näng nak awn yei ne m’lau ah k’aw cu ngai vä, “Bawipa ah m’gäi ciah huham naw bi pyi ci nei!

¹⁶ Ani ah huham naw näng nak ah na law püi gui ci Ng’tuk nak ung ani ah m’gäi ciah huham ah kyak ci.”

¹⁷ Kei cu kä ka sik khai; ak cang ah kei cu ghing ne, Bawipa ah abi gui ah mawng cu ka ng’shäu khai nei.

¹⁸ Ani naw kei cu aknui ah na m’kyuk ci, cun ung phi kä na sih sak ci.

¹⁹ Pum im ah ng’vong m’kawt gui cu na k’hmawn pe ä; kei a cun ung lut ne Bawipa m’hlüngtai khai nei!

²⁰ Shin cu Bawipa ah ng’vong m’kawt nei; düng ciah chang gui bäng lut hlawt ci gui nei.

²¹ Bawipa ka ning m’taam ci, a i ah kyasei ci ung, nang naw na na ng’yak ci, nang naw näng nak na na pek ci.

²² Im co ci gui naw ghäuh ne ami nawng ah lung cu, ng’lat ba ne, avan ung aküikyang pi ah kya lawk ci.

²³ Cun cu Bawipa ah bi ah kyak ci; a i hlawk ah hmu ne cäi vai kyak ci ang!

²⁴ Shin cu Bawipa ah näng nak hnüüp ah kyak ci nei; mi yeikyai khai nei, pawi mi bik khai nei!

²⁵ Na hun gui ä, Bawipa, na hun gui ä! O Bawipa, näng nak na pe gui ä!

²⁶ Bawipa ah ming awn lawk cicu Khanpughi naw hriham k’be sä! Bawipa ah pum im ungka naw hriham kami ning pek ci nei.

²⁷ Bawipa cu Khanpughi nei; Ani cu mikmi ah khan ah ni aih ci nei. Nami kut ung sing ban gui kawt ne, pawi cu tün vä, sonkiang cu veing ne hteit vä.

²⁸ Nang cu ka ning Khanpughi nei, ka ning yei nak ci nei; Na dämduh nak ah mawng cu ka ng’shäu khai nei.

²⁹ Bawipa cu yei na vä, ani cu ni aih ci nei, ani ah m’hni nak cu ng’täi ci nei.