SAM 116 - Cho Bible Common Language 2016

Sih nak ungka Hun nak Gah ciah Chang naw Khanpughi M’taam ci

¹ Ka khü ng’ya ne, ka taigü na ngaih pe sei; Bawipa cu ka m’hni ci.

² Kei naw ka khü päng ung ani naw na ngaih pek ci.

³ Sihnak ga naw kei cu na koi ne; Tüükyaai ciah ng’phuh hmun naw na khai shi sei; kei cu kyih nak la cäi nak awn ka be ci.

⁴ Cun kawn ah Bawipa ka khü cu, “Ka ng’hui ci nei, Bawipa, na hun ä!”

⁵ Bawipa cu m’gein nak la ni nak mi Khanpughi cu chimgein nak kyak ci.

⁶ Bawipa naw geinvai cicu shungvong ci; kei ka khüikha yah ung, ani naw na hun ci.

⁷ Ka mumcha, m’lung üp ä, kei ah khan ah Bawipa cu bä pyi ci nei.

⁸ Bawipa naw sih nak ungka na hun ci; ka ng’phli tui na ghuh pek ci, kyuk nak ungka na k’pang ci.

⁹ Cun ah kyasei kei cu Bawipa ah ma ah ka hteit ci, Ghin nak ah kho ung ka om ci.

¹⁰ “Kei ka ng’deng pyi ci nei” ka ci ung phi, ka yum nak cu kä htek ci,

¹¹ Kei cu kyih aih neta, “A u ngaih u vai kä om ci nei” ka ci ung phi.”

¹² Kei ah khan ah ani nak gui ah phäh ah, Bawipa cu a i ka pek khai aw?

¹³ A na hun nak ah hmawk ah yeikyai ne, Bawipa ah ma ah awk vai cu ka law püi khai.

¹⁴ A chang gui van ah ng’bum nak ung ka shaitak cu kei naw ka pek khai.

¹⁵ A chang tumat a sih cu Bawipa ah hmawk ah m’neh aih vai ah kyak ci nei!

¹⁶ Bawipa, kei cu na changshäm ah ka kyak ci nei; kanu ah bi ah mäih ah kei naw na bi ka bik ci nei. Nang naw sih nak ungka na na hun pyi ci nei.

¹⁷ Kei naw m’hlüngtai ne khawihnah nak ka ning pek khai nei, ka taigü ka ning pek khai nei.

^18-19 Na chang gui van ah ng’bum nak ah, Jerusalem kho, theingcim ciah Pum im ung kei naw ka shaitak cu ka ning pek khai nei. Haleluyah.