SAM 115 - Cho Bible Common Language 2016

Khanpughi Tumat Bäng

¹ Nang bäng ung, O Bawipa, Nang bäng ung, keimi ung ah kä kyak ci, Na bämang nak cu om khai nei, a i ah kyasei ci ung ng’täi ciah nam hni nak la na bekhüt ah hmawk ah kyak ci.

² A i ah kyasei chang pakhui gui naw, “Nami Khanpughi a hawi ang?” cine ami na ng’shi gui ang?

³ Kami Khanpughi cu khankho ah om ci; Ani naw ang yak hlü phung bik ci.

⁴ Ngami ah khanpughi gui cu, hnicim chang naw a kut awn ghui la ngui a pyan ah kyak ci.

⁵ Ami m’gawng om ci, kä ng’thu ci gui, ami mik om ci, kä hmuk ci gui.

⁶ Ami hnga om ci, kä ng’yak ci gui, ami hna om ci, kä ng’ghi ci gui.

⁷ Ami kut om ci, kä bi thei ci gui, ami kho om ci, kä hteit thei ci gui, kä thu k’aw thei ci gui.

⁸ Acun gui pyang ne khawihnah ciah chang van cu, ami pyan ah a gup ah mäih ah kyak ci gui nei.

⁹ Israel chang gui, Bawipa ung ng’ap vä. Ani naw ning m’htei gui ne ning shung gui ci nei.

¹⁰ Khanpughi ah taigü gui, Bawipa ung ng’ap vä. Ani naw ning m’htei gui ne ningshung gui ci nei.

¹¹ Bawipa ung ng’ap vä, ani khawihnah ci gui phung. Ani naw ning m’htei gui ne ning shung gui ci nei.

¹² Bawipa naw na shüm gui ne, hriham na pe gui khai nei; Ani naw Israel chang gui la Khanpughi ah taigü gui cu hriham pe gui khai nei.

¹³ Ani kyih aa ciah chang phung cu a zaw adäm ah ciah hriham pe gui khai nei.

¹⁴ Bawipa naw nang la na hta ng’shon am hta nau ning pe gui sä!

¹⁵ Khankho la khomdek tüisho ciah Bawipa naw, nang cu hriham ning pe sä!

¹⁶ Khankho cu Bawipa amät bäng naw khäm ci, khomdek cu mikmi hnicim chang am na pe gui ci.

¹⁷ Bawipa cu aksi naw kä m’taam ci, M’htei kho ah hteit ci naw kä m’taam ci.

¹⁸ Cun ung phi mikmi, mi ghing ci naw tuhbäi la ngawi yä mi yeinak khai. Bawipa cu m’taam nei! Haleluyah!